港聞

下一篇
上一篇

【Emily Online】迪士尼靜雞雞改期 新城堡遲一年落成 (21:21)

迪士尼最新一期擴建計劃嘅第一個項目、「魔海奇緣凱旋慶典」舞台表演星期五(25日)正式開騷,除咗「魔海奇緣凱旋慶典」外,樂園明年會推出以蟻俠同黃蜂女為主題嘅遊樂設施,至於原定喺2019年及2020年相繼落成嘅新城堡同《魔雪奇緣》主題區,園方星期四(24日)就係新聞稿中悄悄更改推出時間,兩者都會延遲一年推出,新城堡同《魔雪奇緣》主題區料分別喺2020年及2021年推出。

其他報道:【世界競爭力排名】基建得分下滑 香港失榜首跌至第二 內地超越台灣

「魔海奇緣凱旋慶典」舞台表演屬於迪士尼首個互動騷,需要觀眾一齊扮海浪、海盜等,財爺陳茂波星期四參加開幕禮睇騷嗰陣,都有一齊扮海浪。不過,個騷位處戶外開放式場地,只有座位有篷遮住,企位就完全係露天,Emily曬到就快燶,所以建議大家等晏啲4、5點嗰啲場次先至好嚟。

舞台位於園內探險世界入口附近,園方稱可容納300人,每日將會有5場表演,每場長約20分鐘。內容同電影《魔海奇緣》相似,講述主角慕安娜(Moana)出海歷險嘅經過,其間需要觀眾一齊扮海浪、海盜等,小朋友坐最前,亦都可以一齊打鼓。

樂園早排租出停車場畀台灣樂隊「五月天」搞戶外演唱會,香港迪士尼樂園度假區行政總裁劉永基話,每晚都有到場留意人流,認為氣氛好好,帶動酒店生意。劉又話,早前參觀過港珠澳大橋嘅出入境櫃位,好期待通車之後可以帶動樂園人流。

其他報道:否認「撻朵」違規帶髮型啫喱上機 馬逢國認誤解機管局規定 願向機場職員講不好意思

其他報道:【佔旺案庭上拍攝】中鐵建:女事主從來不是員工

相關字詞﹕迪士尼 魔海奇緣 魔雪奇緣 城堡 五月天

上 / 下一篇新聞