港聞

【Emily Online】巴士服務聽證會「問」出火花 主席拒運輸署保密形式交文件 (15:19)

香港專營巴士服務獨立檢討委員會第二日舉行聽證會,委員會主席倫明高多次追問運輸署官員,出現唔少火花。

運輸署長陳美寶今朝作供時話,大埔車禍後政府成立包括專營巴士公司同埋廠商嘅工作小組,至今開咗3次會,亦傾過巴士安全設備問題。被問及可唔可以提供相關會議紀錄,陳美寶話,會議涉及內部討論,可以用保密形式交畀委員會。不過倫明高即時拒絕咗,佢話委員會好透明,所有資料都會擺上網,唔可以接受啲唔對公眾公開嘅文件。

另外,今朝亦傾到巴士黑盒嘅問題,運輸署助理署長陳英傑介紹而家巴士上嘅黑盒係有GPS監察巴士位置等。倫明高質疑GPS根本都唔係新科技,佢話早喺1990年,美國嘅媽媽已經識得買啲定位儀器,畀仔仔服兵役時用嚟搵方向。陳英傑話,雖然GPS唔係新科技,但巴士公司會利用黑盒收集更多數據,用嚟分析巴士運作,𠵱啲都係新嘅。

相關報道:【巴士服務檢討】委員會代表律師引工會意見 斥運輸署官員嚴重失職

其他報道:3港客圖騙6萬保險金 遊泰謊稱遇劫被捕

其他報道:元朗新田5月大孖仔被獨留家中 祖母報案 警列虐兒

相關字詞﹕巴士服務檢討 巴士 聽證會 大埔巴士車禍 運輸署 編輯推介

上 / 下一篇新聞