港聞

【Emily Online】醫管局研討會 梁栢賢化身Dr. Strange (11:46)

醫院管理局一連兩日舉行研討大會,唔知係咪因為近期超級英雄大熱,醫管局行政總裁梁栢賢(PY)喺開幕禮由Dr. Leung化身Dr. Strange(奇異博士),佢關注人口老化同慢性疾病問題,期望團隊可以好似超級英雄咁,拯救香港嘅醫療系統,等老友記們可以放心在家中安老。

PY話,本港人口老化帶來一系列挑戰,2016年有116萬名長者,佔整體人口16%,2014年有八成長者死於慢性疾病。PY又話,香港2016年有146萬名長者患慢性病,推算2026年同2036年則會分別增加至205萬及247萬名長者。

另外,PY話2010至2016年嘅非長者同長者增幅分別係0.2%同4%,但2016年數據顯示,兩者患慢性疾病嘅增長比例都係5%,反映同飲食、運動等習慣有關。

PY話要解決問題,要靠團隊合作,例如加強醫管局同非政府組織嘅合作,另外,資訊科技系統都要提升,現時有「預約通」等手機應用程式,未來希望可做到實時檢查(real time assessment)系統,當然,最後都要靠大家自覺保持健康生活習慣。

PY早前公布明年退休,而家雖未真正退休,佢已經想像緊自己喺屋企同親友攻打「四方城」嘅時刻,如果居家安老做得好,即使有慢性疾病都唔使怕。

其他報道:【Emily Online】周浩鼎半價請居民睇《復仇者》 網民:竟然唔揀愛國電影? 

其他報道:致力減低飲酒普遍率 衛署醫生:酒精與7項癌症有密切關係

其他報道:逾百商會聯署反對撤強積金對沖方案 指政府須包底

相關字詞﹕編輯推介 醫管局 梁柏賢 奇異博士 人口老化

上 / 下一篇新聞