港聞

【Emily Online】周浩鼎半價請居民睇《復仇者》 網民:竟然唔揀愛國電影? (18:55)

近日漫威(Marvel)電影《復仇者聯盟3:無限之戰》喺香港各大電影院掀起一陣旋風,更接連打破本地票房多項記錄。不過民建聯立法會議員周浩鼎今日舉辦嘅一場相關電影放映會,就引起唔少網民熱議。

據網傳一張活動宣傳橫額所示,周議員打算喺今日上午9點,喺青衣城一間戲院舉辦「親子電影觀賞活動」。唔少網民都對有關活動有好多睇法,有人就問點解民建聯唔選擇例如《厲害了,我的國》一類愛國大作,又有人就想知呢次活動喺咪免費。

周浩鼎議員辦事處回應查詢時,話呢次活動有108人參與,雖然活動唔係免費,但畀參加者以半價,即係40蚊觀影。問及點解選擇呢套電影,辦事處話係因為有唔少家長帶埋小朋友參加呢次電影欣賞會,而有唔少小朋友亦都係Marvel人物粉絲,所以相信選擇呢套電影會受大家歡迎。

辦事處又強調,香港作為國際城市,除咗內地電影之外,亦都歡迎荷李活電影。無論如何,佢哋都多謝網上群眾留意活動同發表意見。至於將來會唔會再舉辦類似活動、會播放邊一場電影等,職員話暫時未有計劃。

其他報道:傳通識科擬改評分機制 眾志常委質疑有政治目的 黃均瑜批評「太多陰謀論」

其他報道:黃友嘉談「強迫金」:強制儲蓄良好本意不容否定

其他報道:【高鐵】馬時亨:部分車票或無法在港購買 料大型行李不能登車

相關字詞﹕周浩鼎 復仇者聯盟 編輯推介

上 / 下一篇新聞