港聞

【短片】再提內地設「香港城」 馬時亨:年輕人無法負擔香港樓價 (12:01)

港鐵主席馬時亨日前提出在廣東省覓地建設「香港城」,並建議香港青年可考慮在內地置業。他出席商台節目時解釋,就算房屋供應增加,年輕人仍無法負擔香港樓價。他又指,現時年輕人機會比以前多,應放眼世界,「成個國家都係你嘅機會」。

馬時亨表示,大灣區城市樓價比香港低,有些只是香港的四分一、六分一,「我哋有咗高鐵運行,可以住遠啲」。當主持人提到不明白為何香港樓價太貴時,馬時亨回應說:「咁依個又唔關我事啦。依個你要問香港政府喇。(對於地鐵上蓋的房屋)我哋就好被動嘅,你知啦,無謂解釋喇。」

馬時亨指,「香港城」的計劃仍面對不少問題,例如月票問題、稅制問題及上網問題,「我提出嚟,大家有個討論啫」。他又指,就算香港政府有魔術棒,可以在明日找到1200公頃土地起樓,「但並不代表香港年輕人有錢去買」,「就算你多咗供應,當你平咗,好多居屋喇,都(市價)七成喇,年輕人都未必負擔得起。所以我就提出依個另類選擇畀大家,特別係啲年輕朋友」,因為薪金始終追不到樓價。

馬時亨續指,他只是提供一個選擇,「你可以唔去嘅,你鍾意細啲嘅地方,你覺得辛苦啲,依個係你嘅選擇」,他同意現時樓價不應該如此貴,「我自己做過年輕人,我知道依家負擔能力同樓價嚴重脫節,你邊到有錢買啫,無可能買到」。

馬時亨不認同香港年輕人現時的機會少,「佢哋嘅機會多過我哋以前添,我哋以前大學畢業時,機會就係喺香港。但今日如果你放眼世界,你可以話成個國家都係你嘅機會」。他表示,機會仍存在,「我唔相信大氣候會影響晒所有人,但要自己爭取,要放眼世界,有啲年輕人覺得機會成本太高呀。要唔飲媽咪啲湯,要到內地做嘢捱,佢哋覺得機會成本太高,但係依個世界永遠都係有付出有收穫」。

其他報道:【一地兩檢】馬時亨籲議員勿「阻着地球轉」:這世界只是「數票」

其他報道:拍「錢家有道」 澳門藝人無工作簽證 財庫局短片涉「黑工」下架

其他報道:羅致光:坊間對「安老按揭」誤解多 指屬「借款」非收入

相關字詞﹕港鐵 馬時亨 粵港澳大灣區 編輯推介

上 / 下一篇新聞