港聞

【多圖:Emily Online】川金絲猴樂奇一歲生日 戒奶最愛食花生 (18:56)

大家仲記唔記得,第一隻喺香港出世嘅川金絲猴「樂奇」?原來今日係佢嘅一歲生日,海洋公園特登整咗個冰水果「蛋糕」,畀佢做生日禮物。Emily仲聽講,樂奇而家戒緊奶,最鍾意食花生同菜心,仲學識幫父母整理儀容㖭。

海洋公園話樂奇重3公斤,平時活潑好動,但喺磅重時,就會乖乖地坐上磅。佢又有好奇心,觀察力又敏銳,唔止識得幫自己梳毛,仲會幫爸爸「其其」同媽媽「樂樂」整理儀容㗎。

樂奇已經慢慢開始戒緊母乳,食更多固體食物,花生同菜心都係佢嘅最愛。海洋公園趁佢今日生日,唔止送咗個有壽桃雕刻嘅冰水果生日「蛋糕」畀佢,仲用南瓜整多咗個裝飾,等佢同爸爸媽媽一齊玩。Emily見到樂奇眼仔碌碌咁精靈,都祝佢以後身體健康,快高長大呀!

其他報道:港大推新App 掃食物條碼即知營養評分

其他報道:天文台過去5年接89宗UFO報告 西貢區最多

相關字詞﹕海洋公園 川金絲猴 樂奇 編輯推介

上 / 下一篇新聞