港聞

【Emily Online】華服節開幕 梁振英著華服致辭 稱成一帶一路「民心相通」平台 (21:45)

第七屆國際華服節星期六(7日)起,一連兩日喺文化中心露天廣場舉行,全國政協副主席、前特首梁振英(CY)都有出席開幕禮,仲著住華服上台致辭。佢話華服係中華文明為人類留低嘅瑰寶之一,仲話華服節係一帶一路「民心相通」一個好好嘅交流平台㖭。

其他報道:香港新聞博覽館料年底啟用 十件新聞大事現可投選

CY喺facebook上載咗自己著住灰藍色華服致辭嘅相,話見到咁多參加者著上有不同華夏風韻嘅服裝,「令人深深體會到中華文明的廣博」。佢喺講辭入面提到,國際華服節嘅舉辦目的,係向社會推廣華夏服飾,亦可以畀公眾了解豐富燦爛嘅華服文化,同埋與服飾有關嘅歷史、藝術、禮儀同文化內涵等。佢仲形容著華服係「把歷史穿在身上」,畀大家欣賞人類喺不同歷史時期對美好生活嘅追求。

CY致辭時都不忘提一提,內地近年大力倡議嘅一帶一路,話古時中外服飾設計嘅交流,就係一帶一路入面「民心相通」嘅重要一環,華服節就係好好嘅交流平台。

政府3月底公布新一任公民教育委員會名單,今次華服節主辦單位夫子會,主席黎展康透過自薦計劃成為委員之一。佢都有出席國際華服節開幕禮,CY致辭時亦第一個就先稱呼咗佢。CY話要衷心感謝夫子會同相關團體,合力籌辦今次華服節,仲話好難得籌辦者中唔少都係年輕人,高度讚賞佢哋對中華文化嘅嚮往同傳承,同埋對促進中外交往嘅擔當。

其他報道:【一地兩檢】公聽會工黨示威 批破壞基本法 質疑將致港鐵加價

其他報道:【多圖】現身支持集會 戴耀廷重申無鼓吹港獨 質疑譴責者或有政治動機

相關字詞﹕梁振英 華服節 華服 夫子會 公民教育委員會 黎展康 編輯推介

上 / 下一篇新聞