港聞

【Emily Online】「香艷禮物」已寄葉劉 談青年報告不提港獨 劉鳴煒:做唔出送學生去死 (18:19)

話說今日正式獲委任青年發展委員會副主席嘅劉鳴煒,舊年2月底出席民主黨前主席劉慧卿嘅網台節目,節目上向主持卿姐送上佢慈善跑贏到嘅「REGINA MIRACLE」千元內衣券,結果卿姐叫佢送畀新民黨葉劉淑儀。

事隔一年,劉鳴煒再上劉慧卿同一節目,又再傾到呢份「香艷禮物」。卿姐講明無收過,劉鳴煒就講笑話,當時正參選特首嘅葉太,需要一個「MIRACLE」,佢就真係將呢份「香艷禮物」,寄咗畀葉劉淑儀當時嘅競選辦。

卿姐話佢「抵死」、「好鬼曳」,仲講笑話之後葉太都無再上過佢節目,搞到劉鳴煒即場搵鏡頭「贖罪」,隔空向葉太深情對話:「我認衰,Regina,如果你睇緊呢個節目,嗰次個idea係我嘅,唔好怪卿姐」。

兩人節目上另外談到年輕人問題,劉鳴煒話委員會早前舉行105場針對青少年嘅諮詢會,大家都認同要關心學生情緒、少啲怪獸家長等。卿姐質疑,報告完全無提敏感嘅政治問題,「學生睇到份報告,會唔會覺得你堅離地呢?」

劉鳴煒話學生會聲音不完全代表學生,佢份報告中已盡量有咁多寫咁多,但係有啲嘢佢實在寫唔落手,例如係唔會建議學生去送死,做違反《基本法》嘅事,「有啲人唔mind學生去送死,但我做唔出。」佢話唔係唔可以討論,唔係唔敢提,而係「了解咗之後,本土同港獨的話,幫唔到佢」。

佢話卿姐太睇得起佢,「你覺得呢份報告可以爭取到本土、港獨、自決或者民主咩?」佢話青年發展委員會只係「委員會仔」,如果呢份報告可以爭取到教育大改革、青年房屋優先,搞掂晒就好巴閉,但佢真係做唔到。

其他報道:淘大影藝今天Last Day 街坊不捨:邊度再有正常價位嘅戲院

其他報道:網民點擊13萬次僅獲12.2元版稅 作詞人呻:又話寫首歌食到餐茶餐廳?

相關字詞﹕編輯推介 劉鳴煒 葉劉淑儀 香艷禮物 劉慧卿  港獨

上 / 下一篇新聞