港聞

【Emily Online】#全民DSE 成熱話 「老餅」報考有咩要注意? (00:01)

財政司司長陳茂波星期三(28日)發表財政預算案,宣布來年中學文憑試免考試費,自修生亦受惠,到下晝facebook同instagram「#全民DSE」已經成為熱話。有「舊制」CE同AL考生話想體驗一下DSE難唔難;有人就話以前考得麻麻地,想趁免費試多次。大家係講笑定認真,Emily唔係佢哋肚內條蟲,唔知道;至於報考有咩要注意,都可以分享一下!

根據考評局資料,只要你滿足「19歲或以上」、「有中六或以上學歷」同埋「考過CE或者AL」任何一項條件,都可以用自修生身分報考DSE。

自修生可報科目,包括中國語文、英國語文、通識、數學(M1 統計類)、數學 (M2 純數類)、企業、會計與財務概論、經濟、中國歷史、中國文學、倫理與宗教、地理、歷史、健康管理與社會關懷、資訊及通訊科技、英語文學、音樂、體育、旅遊與款待、法語、德語、印地語、日語、西班牙語、烏爾都語。

另有幾科要求比較特別,例如報考視覺藝術要提交個人作品;生物、化學同物理,就要喺CE或AL考過相關科目先可以報名。另外應屆中六學生考部分科目時,會計埋校內評核結果;自修生就「一試定生死」,只計公開試成績。

決定好考邊科,亦要留意報名時間。來屆DSE 9月13日至10月9日接受報名,考生須透過DSE網上服務報名系統提交申請 https://www.hkdse.hkeaa.edu.hk ;最後就係要注意各科目幾時考試喇,大部分係3至5月,但仍有一啲例外,大家到時要自己留意呀。

財政預算案相關報道:

【一文睇派糖措施】預算案你有無受惠?

三類典型家庭 哪類減稅最多?

圖書手推車入校園 鼓勵幼園生閱讀

相關字詞﹕考評局 財政預算案 編輯推介

上 / 下一篇新聞