政府擬放寬傳統媒體跨媒體擁有權限制，前日（20日）起展開為期3個月的第一階段公眾諮詢，商務及經濟發展局常任秘書長（通訊及創意產業）利敏貞當日應節穿上中國傳統服裝出席記者會。商經局長邱騰華今日出席鄉議局新春團拜嗰陣，向Emily大讚利嘅衣著恰如其分，好有「fashion sense（潮流觸覺）」，「有selling point之餘，講嘢又有point」。至於佢會否親自一試著傳統服飾出席記者會，局長就好似有啲猶豫喇。
而商經局副局長陳百里都話利嘅衣著係好嘅「fashion」，係中國文化嘅其中一種。佢又力銷，香港都有本地設計師去造呢啲中國傳統服飾，例如旗袍咁，佢哋仲喺傳統中加入新潮元素，叫大家多多支持本地設計師。
Emily之後向商經局查詢，想知常秘件衫係咪都係撐本地設計師。對方回覆話工作以外問題，不作評論。利敏貞又補多句，今日大年初七人日，順祝大家身體健康、生活愉快。