港聞

下一篇
上一篇

【Emily Online】寄競選宣傳單張無貼郵票 鄧家彪:個別義工一時大意 (21:04)

立法會新界東補選下個月11日舉行,各候選人近日宣傳攻勢不斷,寄傳單等係慣常手法。有網民噚日就話收到由工聯會寄出,為工聯會兼民建聯成員、新東補選候選人鄧家彪宣傳嘅單張,呼籲選民「全家總動員 齊投鄧家彪」,但封信竟然無貼郵票,郵局話「郵費不足」,罰收件人4蚊! 鄧家彪今日同Emily講,要對受影響嘅工聯會會員致歉,以佢所知,只係個別義工一時大意無貼郵票,相信唔會有大量無貼郵票嘅單張寄出,但未知相關信件數量。

工聯會今午都喺facebook致歉,話受影響會員可以致電該會,佢哋會盡快跟進。至於點跟進,鄧家彪話,佢哋會派人到受影響會員屋企道歉,至於會否畀返郵資,咁又要問返工聯會喇。

對手新民主同盟范國威喺facebook上載咗張改圖惡搞,將鄧家彪宣傳海報上嘅口號「跨越 共享」改成「郵費 共享」。阿彪候選人編號係4號,范國威於是創作埋一句設計對白:「罰過大家4蚊 大家就實記得我係4號啦。」阿彪回應,政見幾唔同都好,都會保持胸襟同幽默感,其他嘢都唔重要,而家最緊要係先做補救措施。

最後都係要提提大家,今屆新東補選候選人,除咗鄧家彪同范國威之外,仲有黃成智、陳玉娥、方國珊同趙佩玉。

其他報道:【監刀中途離院】港大醫學院決定 吳國際約滿後不再任職

其他報道:【短片:網上熱話】大埔墟站Busking影片爆紅 天水圍女歌手唱出街頭好聲音

其他報道:環團推算27個私人體育會上年度共獲免租4億 粉嶺高球場佔8200萬

相關字詞﹕工聯會 立法會補選 鄧家彪 新界東 編輯推介

上 / 下一篇新聞