港聞

【Emily Online】陳恒鑌再出片訪問「諾先生」 論提名「三個後生仔」和平獎 (22:12)

「雙學三子」黃之鋒、羅冠聰同周永康,以及整場「雨傘運動」,獲美國12名國會議員提名,角逐2018年諾貝爾和平獎。民建聯立法會議員陳恒鑌,今朝就先喺fb出帖,話「如果『諾先生』(Alfred Nobel)還在生,一定會被激到噴血並即時取消和平獎!」結果惹來部分網民留言取笑,質疑佢唔知「諾貝爾」係姓氏。陳恒鑌先係個別留言回應,到今晚,佢就再喺fb出段短片。

相關報道:【Emily Online】雙學三子獲提名和平獎 李慧琼批「匪夷所思」 陳恒鑌:「諾先生」會激到噴血

喺呢條分零鐘嘅短片,陳恒鑌就化身主持人,話要訪問一位重量級嘉賓「諾先生」;他旁邊一位跟他裝束極近似、但手持諾貝爾肖像遮面嘅人就話:「你都係叫番我『諾貝爾』啦!」

陳恒鑌接著都係要講:「係嘅,諾生!」然後就同佢隔籬呢位「諾貝爾」講,有三位「發起非法佔領、破壞社會秩序、挑起社會矛盾嘅後生仔」竟然獲提名,可謂係「笑話」,對諾貝爾和平獎係「好大嘅侮辱」。

緊接住,短片就出現「諾貝爾」「噴血」嘅影像效果,同埋「諾貝爾」嘅自白,話「我呢個和平獎」嘅宗旨,「係為咗表彰嗰啲促進民族同埋國家團結友好嘅人,又或者係去取消同埋裁減軍備,為和平會議嘅組織啦,又或者宣傳盡到最大努力嘅人,或者作出最大貢獻嘅人而設架!」

陳恒鑌最後hashtag「#認真你便輸了」、「#請勿轉移焦點」、「#多謝黃之鋒羅冠聰周永康提供笑點」、「#達文西」同「#諾貝爾」。

相關報道:獲提名諾貝爾和平獎 雙學三子:榮譽歸於人民

其他報道:【食安檢驗】98%食物樣本含塑化劑 兩款食油超行動水平

其他報道:律政司索訟費 許仕仁毋須支付 其餘3被告合繳568萬 

相關字詞﹕編輯推介 陳恒鑌 諾貝爾獎 諾貝爾和平獎 和平獎 黃之鋒 周永康 民建聯 羅冠聰

上 / 下一篇新聞