港聞

【Emily Online】雙學三子獲提名和平獎 李慧琼批「匪夷所思」 陳恒鑌:「諾先生」會激到噴血 (15:11)

「雙學三子」黃之鋒、羅冠聰同周永康,以及整場雨傘運動,獲美國12名國會議員提名,角逐2018年諾貝爾和平獎。民建聯立法會議員陳恒鑌,今朝就喺facebook專頁貼出相關報道,話事件係對諾貝爾嘅侮辱,亦係令諾貝爾奬大幅貶值嘅例子,仲話「如果『諾先生』(Alfred Nobel)還在生,一定會被激到噴血並即時取消和平獎!」

唔少網民留言話,諾貝爾(Nobel)係姓氏,取笑陳恒鑌稱諾貝爾為「諾先生」;亦有網民留言反問,咁參加建築、測量、都市規劃及園境界立法會補選嘅司馬文係咪姓司、退役英超球星碧咸姓碧丶荷里活名導演史匹堡姓史。

不過,Emily亦見過唔少編輯同事同行家,將翻譯嘅姓氏第一個字當作簡稱,好似美國總統特朗普同國家主席習近平會面,唔少傳媒會簡稱為「習特會」等等。當然,若平日行文、又唔係冇位嘅話,寫番全稱就100%準確啦!

民建聯主席李慧琼今日更形容,有關提名「匪夷所思」,又指佔領行動影響香港商業行為,帶嚟不便,令香港喺一國兩制下享有嘅空間可能收窄,強調佔領並非和平事,和平獎提名對香港無益處。

提提大家,另一名參加建築、測量、都市規劃及園境界立法會補選嘅係謝偉銓。

其他報道:「係咪九巴司機?」 16歲少年涉持刀嚇人被捕

其他報道:【九龍西論壇】住觀塘劏房14年 蔡東洲泣不成聲:高官啲樓應該拎出嚟

其他報道:24歲女見習律師太古城墮樓亡

其他報道:姦13歲女成孕 前警員囚16年8月 另與10歲幼女亂倫辯方:沒什麼求情說話可

相關字詞﹕陳恒鑌 諾貝爾 編輯推介 李慧琼 諾貝爾獎 諾先生

上 / 下一篇新聞