港聞

下一篇
上一篇

【Emily Online】譚SIR上節目被英文突襲 笑住叫志雲大師「大佬」 (11:51)

港區人大選舉噚日投票,首次參選就報捷嘅譚耀宗即場以廣東話、英語感謝選委支持,其英語感言「I think I very much thank you all the members of electoral committee to support me」被網民熱傳。佢今朝上商台節目,一開始就被問到呢件事,譚Sir解釋話當時因為有記者要求講英文,自己就「隨口噏兩句囉」,但明言「唔使喇嘛,因為已經講咗一大段中文,你哋自己翻譯算啦」。之後佢應主持人陳志雲要求用普通話再致謝一次。

當譚Sir講完一輪感言後,陳志雲又用英文「突襲」佢,譚Sir即時耍手擰頭笑住話:「嘩吓,唔洗考晒呀,大佬。」佢話,費事畀人揪秤呀,又話免得誤導聽眾。譚Sir又謙虛咁話:「有時講嘢應酬兩句,唔係好嚴謹嘅嘢,唔好怪責啦。」

譚耀宗又提到自己學習普通話嘅往事,原來譚Sir係85年起草基本法時先學普通話,「當時麻麻地,應酬就得,開會喎,好多名詞喎,當時小心聽人講,普通話係嗰時一步步學番嚟,開會全部用普通話嫁嘛」。譚耀宗又話,雖然冇學過拼音,但亦唔算係港式普通話,「可能我聽咗好多內地普通話。」

其他報道:【女童肢解案】被告庭上呆滯稱不明白控罪 還押至2月再訊

其他報道:傳真社急籌380萬元 吳曉東:做到最後一分鐘 公眾決定命運

其他報道:譚耀宗樂意成人大常委服務國家 不會反映不符中央政策的意見

相關字詞﹕港區人大選舉 譚耀宗 陳志雲 選委 編輯推介

上 / 下一篇新聞