港聞

【修改議規】謝偉俊指「零票當選」好難:若無共主,無可能無票 (15:03)

立法會日前通過修改《議事規則》,議員李慧琼、謝偉俊、朱凱廸及前議員劉慧卿出席港台節目《城市論壇》,談論議事規則修改後的策略。其間,朱凱廸多次提及民主派票數多議席少,批評有議員零票當選,謝偉俊則回應:「你哋以為票多,一定要攞晒席位多架咩?」

其他報道:【修改議規】李慧琼:立會變人大類比「不倫不類」 朱凱廸:關鍵時須更激進

謝偉俊指,全世界許多民主國家,包括美國、英國國會,都有一部分人毋須由人民選出來,用作制衡功能,適當反映某些階層較周詳看法。主持蘇敬恆追問:「點解無票會周詳啲?」謝偉俊只說:「無票好難選到,令嗰個功能界別無人敢挑戰你,唔係咁容易。功能界別如果係多人爭嘅話,你係無可能無票,因為無一個共主,無可能無票。呢個係制度問題。」

討論期間,謝偉俊又叫劉慧卿試下零票選舉,稱零票非常之難:「你又試下攞唔攞到零票呀?」劉慧卿回應,無可能選她唾棄的選舉:「我選過七屆(直選),未輸過。」

李慧琼亦表示,不能因為不同意議會組成方法而作出暴力事件,英美首長亦非一人一票選出來,特朗普都是用選舉人票選出來。她續指:「佢哋係咪好公平呢?根本無完全公平,你要尊重歷史架嘛,個制度上次叫你改你又唔改。」

對於有市民稱中國要以香港庫房牟利,謝偉俊斥騙人:「全世界都知道,中國有咩係無架?最唔缺乏嘅係錢呀!幾時會嚟攞香港嘅錢?唔好呃香港人啦!」

其他報道:陳茂波:預算案盼提升市民幸福感 晤學生指尋理想要顧現實

其他報道:【禦寒貼士】勿喝酒精飲品 吃火鍋忌用生蛋作蘸醬

相關字詞﹕立法會 議事規則 編輯推介 謝偉俊

上 / 下一篇新聞