港聞

【Emily Online】治療犬進駐港大圖書館 減學生壓力 一星期逾160人報名 (13:45)

踏入大學嘅考試季節,香港大學圖書館推出駐館治療犬試驗計劃,希望可以舒緩港大學生壓力,預約咗嘅學生同教職員可以喺港大呂志和法律圖書館同古代牧羊犬熊猫 (Jasper) 相聚半個鐘,館長謝玲櫻(Irene)透露,本來諗住只開放3日共36個名額,但一個星期內已經有超過160人報名,所以再加開3日共36個名額,先到先得,而且都就嚟額滿喇。

其他報道:教大幼教111人爭一位 理大酒店管理最多報讀

治療犬熊貓(Jasper)係一隻古代牧羊犬,今日掛住張個佢張相同個名嘅「港大職員證」第一次同傳媒見面,面對一大堆鏡頭Jasper都未驚過,仲不時會走去Emily同一班記者度任摸任影唔嬲。Jasper嘅主人、港大圖書館公共關係及發展主管陳洪華(Gary)話,Jasper係佢8年前喺救狗之家領養返嚟,依家已經9歲,並且接受過治療犬嘅訓練,仲攞埋牌𠻹,同學仔可以放心同佢玩。

Jasper下星期一、三、五就會同同學同教職員見面,每日3節,每節半個鐘,最多4個人參與,Gary會在場帶大家互動,玩下拉繩等小遊戲輕鬆下。由於反應太熱烈,港大已經喺今個月19、20同22號加開咗共9節,希望畀多啲同學可以同Jasper玩,同學要報名就快手喇!

其他報道:華小校長教師函港華反對轉直資 批轉制屬專業誤判 校友:不能共渡好心分手

其他報道:浸大擬租珠海學院舊校 台政府物業 月租60萬 校董信沒政治考慮

相關字詞﹕治療犬 香港大學 圖書館 減壓 編輯推介

上 / 下一篇新聞