港聞

【葉劉稱遭恐嚇】李兆富否認恐嚇 「從來唔會做說客」 但認有收錢替領展做政策研究 (17:21)

新民黨主席葉劉淑儀聲稱,因為自己近日在立法會和專欄批評領展,數星期前領展派專欄作家李兆富,向其黨政策總裁袁彌昌指「叫葉劉好收手,再不收手就會郁她的區議員」。她說不知道是誰派李兆富來,但認為對方或與領展有朋友關係。

李兆富接受本報訪問時坦承「同領展好多員工都係好好朋友」,雖有收錢替領展做公共政策研究,但從來不會當說客。他又堅稱當日巧遇袁彌昌時絕沒有出言恐嚇,認為對方可能與葉太在溝通上有誤會。

其他報道:葉劉稱被領展派人恐嚇 斥對方事後欲約飯局擺平是「荒謬」

李兆富透露,幾星期前去「捧容海恩場」時巧遇袁彌昌:「嗰日係公開場合嚟,容海恩講共享經濟吖嘛,我咪去睇,根本無諗過會撞到佢(袁彌昌)。」他說當日雙方談到葉劉淑儀等新民黨人對領展有不少建議,包括房地產投資信託基金等,認為對方在一些地區問題上,與領展地區經理商討,「意見未必去到上邊」:「我咪話可以透過我同佢哋啲高層接觸囉,一心都係想幫新民黨。所謂恐嚇嗰啲,應該都係袁彌昌同佢講嗰時有誤會,我唔知佢哋點溝通喇。」

李兆富說自己對領展了解頗深,多年來亦有就公司政策和推高租金等撰文表述,認為現時很多評論和意見都對領展不公平:「市場一定要有空間發展。我大約係2005年12月左右發表第一次寫領匯(領展前身)啲嘢,到而家諗法都無變,一直支持房委會『拆骨』,因為一條龍式管理好無效率。至於出邊話領展搞到市民無啖好食,係經濟謬誤。房委會旗下都有好多商場,租金夠低喇掛?啲嘢又都唔見得有平。」他認為自己可以作為「橋樑」,協助政界與領展多溝通:「我同領展係好朋友,同佢好多員工都係好好朋友!」

記者續問他跟領展有否利益關係,李兆富說:「我有時會幫領展做公共政策研究,係有收錢嘅。之前競爭法落實時就做風險評估,又試過做土地規劃分析,同埋房地產信託基金嗰度,喺基金修例後研究吓對市場有咩影響,全部都係內部參考用途。但係……從來唔會做說客囉!」

對於葉太聲稱其後領展透過第三者向她致歉,邀請她食餐飯;李兆富說完全不知情,強調肯定跟自己無關:「之後我係有一次喺獅子山學會聚會度見到領展啲人,但我嗰日無咩同佢講嘢,現場仲有好多其他朋友。我又唔覺得自己做錯咗啲咩,點會特登提起件事?」據他所知,領展早前曾在一份英文報章撰寫letter to the editor(給編輯的信),估計道歉一事可能與此有關。

其他報道:羅冠聰機場遇襲 5被告4罪成1脫罪

其他報道:【全球學生閱讀能力】港學生課堂投入包尾  專家籲家長勿「谷壞細路仔」

其他報道:【修改議規】蔣麗芸指「全面開戰」:重光之時 李慧琼籲勿變戰場 指「議會是講道理地方」

相關字詞﹕李兆富 葉劉淑儀 袁彌昌 編輯推介

上 / 下一篇新聞