港聞

【短片:Emily Online】通過致謝議案後梁君彥叫議員留步 原來代宣布AY結婚請飲 (21:28)

立法會今晚通過《施政報告》致謝議案,係9年來首次。但主席梁君彥宣布議案通過之後,突然叫在席議員留步,睇緊直播嘅Emily都嚇一嚇,諗緊佢有咩大事要宣布。結果,原來梁君彥係要話畀各位議員知,今年較早時喺丹麥結婚嘅公民黨議員楊岳橋(AY),下個月8號擺酒請飲,邀請大家出席。

相關報道:立法會9年來首次通過《施政報告》致謝議案

但係睇返梁君彥當時嘅發言:「郭榮鏗議員就要求我宣布,幫楊岳橋議員(宣布),喺12月8日佢會有個結婚酒會請各位」,仲話喺平靜之後「有啲嘢去沖喜,大家都好開心」。AY聽到呢個宣布,就即刻喺座位彈起身向其他議員鞠躬合十致謝,其他議員就忍唔住大笑。

但係點解係郭榮鏗叫梁君彥宣布嘅?AY嘅議員辦事處同事就喺facebook專頁「810扮工室」解釋,原來AY事前都唔知情,「係郭榮鏗搞事」,仲喺帖文入面標籤咗郭榮鏗,郭榮鏗轉發帖文時,就加上一個「馬騮掩嘴」嘅表情符號回應。

唔少網民就留言恭喜AY同埋楊太,仲有人問「收到12月8日……係咪全港市民聽到都有份㗎?」Emily都喺度恭喜AY夫婦,祝福兩位百年好合,早生貴子。

其他報道:【網上熱話】學校旅行都帶功課 搞喊小朋友 操普通話家長:測驗不合格,睇人玩是懲罰

其他報道:向戲院反映不果 藝術家稱擬所在商場賣廣告 終為售票員成功爭取有櫈坐

相關字詞﹕立法會 施政報告 致謝議案 楊岳橋 梁君彥 郭榮鏗 結婚 婚宴 編輯推介

上 / 下一篇新聞