港聞

【Emily Online】霍啟山擬明年搞粵港澳大灣區足球賽 高永文都想參加 (22:15)

政府近期一直大力推動同粵港灣大灣區城市嘅交流。霍英東集團副總裁、廣東青年總會執行主席霍啟山亦有計劃,打算出年舉辦「粵港澳大灣區青少年足球比賽」,希望畀香港同大灣區其他地方嘅年輕人透過足球交流。

霍啟山擔任今年「香港青年服務領袖獎」獎勵計劃評審,今日出席獎勵計畫發佈會時話,同青年人溝通,最好就係從佢哋興趣出發,例如體育活動。佢話自己熱愛足球,諗住趁下年省港盃成立40周年,延伸出「粵港澳大灣區青年少足球比賽」,先喺全港18區搵出青少年代表,再同大灣區其他城市青少年比賽。佢話呢幾年都有帶年輕人去唔同地方踢比賽,希望透過明年大灣區足球賽,促進青年同內地交流。至於首屆賽事喺邊度舉行?霍啟山就打算喺廣東搞,原因係香港同廣洲有好多交通基建,交流都方便啲。

講到青年問題,政府周二正式推出青年「自薦計劃」,招募年輕人加入5個政府諮詢委員會。霍啟山都做過海濱事務委員會委員,佢覺得今屆政府真係好重視年輕人意見,仲知道今次只係第一輪嘅自薦計劃,未來都會有其他委員會自薦計劃推出,畀年輕人加入。佢就話自己暫時冇自薦,因為名額有限,希望可以畀其他年輕人加入呢啲委員會,自己就會密切留意之後再推出嘅委員會。佢又話,鼓勵緊廣東青年總會嘅委員參加自薦計劃。

出席同一活動嘅前食物及衛生局局長高永文就話,年多前喺一個青年足球活動上同霍啟山碰面,已經聽到對方想搞粵港澳大灣區青少年足球比賽,而家知道籌備緊好開心,自己好支持,希望出年喺廣東搞完第一屆之後,可以喺不同大灣區城市巡迴舉辦。

佢話自己都好鍾意踢波,好想參加比賽,但笑言自己冇咁後生,未必踢到,但可以考慮下做領隊,仲叫霍啟山搞啲小型嘅5人足球賽畀佢過下腳癮。高永文話,自己離開政府之後都有繼續喺青年和醫療範疇支持政府,又呼籲香港年輕人要認識多啲香港以外嘅事物,擔心喺全球化下,年輕人視野局限喺香港對自己同香港整體發展都唔好。

其他報道:WhatsApp全球多地一度「死機」 香港用戶5時起陸續恢復連線

其他報道:首批內地大閘蟹通過化驗今出售 5両重料賣130元

其他報道:調查:半數公司明年加薪 平均幅度3.5%

相關字詞﹕粵港灣大灣區 體育 足球 編輯推介 大灣區

上 / 下一篇新聞