港聞

【Emily Online】城市論壇談新中策組高薪聘青年 蘇敬恆再被「關心」 (15:31)

港台節目《城市論壇》今日討論政府新中策組以高薪聘請青年加入,早前有傳應徵食衛局政治助理觸礁嘅主持蘇敬恆,再次成為台上台下焦點。

學聯前副秘書長岑敖暉喺節目上批評,政府高薪請青年入新中策組係「收買」,又形容對港人嚟講,選擇艱難地挺直腰版,定係舒服做人,係一個沉重問題。蘇敬恆就問岑敖暉,加入政府係咪一定無腰版,兩者能否兼得呢?岑敖暉話,如果政府係走向民主,青年加入政府係有發揮空間,但如果政府係走向威權,青年發揮到幾多就有相當大保留。

台下中學生向嘉賓發問時,亦不乏針對蘇敬恆嘅尖銳問題。有學生話,有報道指蘇敬恆未能通過品格審查做政助,問佢品格審查係審查乜嘢,另外有學生形容,年輕人加入新中策組只會淪為政治花瓶,呢種渠道能否真正吸納聲音,相信蘇敬恆明白咁話。蘇敬恆喺節目休息時笑住回應,話「多謝同學咁關心我」。

蘇敬恆喺節目後被問到政助一事時,重申無新消息。至於會唔會加入新中策組呢?蘇敬恆未有正面回應,話多謝大家繼續關心自己,佢話好多年輕人都關心社會,民間亦有好多由年輕人組成嘅研究組織,關心社會同有興趣做政策研究嘅朋友,可以一試。

今日適逢蘇敬恆主持第100集《城市論壇》,工作人員喺節目後特登送咗個蛋糕畀佢慶祝。蘇敬恆話,自主持節目以嚟,傾咗唔同話題,節目經歷唔同變化,嚟緊社會有不同議題討論,希望大家繼續支持《城市論壇》。

其他報道:【臉容曝光】李嘉誠罕有偕孫女李燕寧現身馬場

其他報道:調查:94%贊成設標準學時 逾半認為應「一日7小時」

其他報道:沙田明星海鮮舫今結業 熟客最愛河畔景大感不捨

相關字詞﹕蘇敬恆 城市論壇 編輯推介

上 / 下一篇新聞