港聞

【Emily Online】勞福局政助去立法會見議員 受女記者歡迎 (21:30)

特首林鄭月娥鼓勵官員多去立法會同議員溝通,搞好行政立法關係。立法會復會以嚟,各局政治助理已頻頻喺立法會出現,包括政務司長政助蕭嘉怡、運房局政助符傳富、政制及內地事務局政助吳璟儁等。今日勞工及福利局長政治助理馮興禮(Henry)亦喺副局長徐英偉陪同下,去到立法會同班議員以及記者打招呼,意外成為場內焦點。

Henry一出現就被一班女記者圍住。Emily喺現場聽到,班女記者除咗問佢做政助慣唔慣,更會打探埋佢有無女朋友。Henry好直接咁話已經名草有主,女友係律師,但係仍然趕唔走一班女行家興致。有人仲主動請纓,話想帶佢遊覽成個立法會。而Henry就話自己今次係履新後,第二次嚟立法會,上次喺二樓公眾席聽林太讀施政報告,無機會同議員打招呼,所以今日想同每個議員都接觸下。

Henry作為新任政助,大家未必了解佢背景。其實佢爸爸係立法會前秘書長馮載祥,媽媽馮馬潔嫻就係香港殘疾人士體育協會主席。兩人本身喺政商界都多朋友,馮太更協助過前政務司長唐英年參選特首。不過Henry落到立法會就唔係人人認得,如民主黨黃碧雲見到Henry同佢打招呼嘅時候,就遲疑咗陣先有回應。

其他報道:麥美娟倡貓狗納《道路交通條例》 馬路被撞司機要報警 食衛局:正檢討

其他報道:教大幼兒系助理教授疑因選民資格被取消 恐嚇將選舉主任「碎屍萬段」

其他報道:【一地兩檢】官員不赴學生論壇? 張建宗:政府樂於聽意見 好宏觀推介方案

相關字詞﹕立法會 政治助理 馮興禮

上 / 下一篇新聞