港聞

【Emily Online】鬍鬚曾談記憶 難忘愛犬過身 (16:38)

喺特首選舉中敗於現任特首林鄭月娥嘅前財爺曾俊華,近日曝光頻頻。繼噚晚同林鄭前後腳現身公共專業聯盟10周年晚宴,同早前宣布聽日起,逢星期日晚喺商台會有音樂節目後,曾俊華今日又喺佢fb出咗條新片,仲留言「記憶是...念念不忘」。

相關報道:【Emily Online】晚宴跟林鄭月娥前後腳 曾俊華自比希拉里

片段係一段香港電台拍攝同剪輯嘅1分鐘短片。鬍鬚曾喺片段中同大家講,每個人嘅成長過程都會留下段段記憶,反過嚟亦提醒大家要珍惜依家嘅每一刻。佢自己最記得啲開心事,就包括認識太太、兒孫出世;其中一件比較傷感嘅,就係伴隨佢哋十幾年嘅鬆獅犬過身。

其後,曾俊華就提及認知障礙症患者,指佢哋嘅記憶都要一點一滴咁失去,咁點樣先可以幫佢哋修復畀歲月偷走嘅記憶呢?

片段最後出現「修復記憶」4字。曾俊華就在留言hashtag「#修復時刻」、「#認知障礙症」、「#照顧者壓力」、「#修復記憶」,同埋「#忘掉天地彷彿也記不起自己」。

查實,曾俊華上個禮拜三(4日)中秋節正日,都曾經喺fb出咗段片,片中佢就喺度修復緊一個瓷器,又話自己呢幾個月都喺度修復一啲嘢,仲請公眾繼續留意佢fb。另一方面,一個當天啟動嘅「修復時刻」fb嘅「電視節目」專頁,就接連share咗曾俊華上述嗰兩段片。如今睇嚟,曾俊華另一個曝光大計嘅謎底,似乎都呼之欲出喇。

曾俊華fb最新短片

相關報道:【短片:Emily Online】曾俊華逢周日晚商台開咪講音樂

 

相關字詞﹕曾俊華 編輯推介 認知障礙症 編輯推介

上 / 下一篇新聞