港聞

【Emily Online】晚宴跟林鄭月娥前後腳 曾俊華自比希拉里 (23:09)

公共專業聯盟今晚舉行10周年晚宴,請嚟特首林鄭月娥同前財政司長曾俊華出席,不過呢兩位特首選舉時嘅對手就前後腳到場,未有碰頭。曾俊華致辭時講笑話,公專聯安排兩人到場嘅時間安排得好體貼,又重提自己落選特首,話去年美國總統選舉,民主黨希拉里贏選民票數,但最終輸選舉人票,自己同希拉里有好多相同之處咁話。

曾俊華當然有同大家講吓近況,佢話自己生活安好,近期參加慈善籌款活動同主持電台節目,同家人相處時間多咗。佢講笑話,多謝主辦單位邀請佢嚟晚宴,因為免費餐對退休人士好重要,希望公專聯考慮吓每季都舉辦晚宴。

曾俊華又攞公專聯英文名Professional Commons開玩笑,話呢個名係矛盾修辭(oxymoron),因為既然係專業(professional),又點會係平常人(commons)呢?呢個笑話就引嚟全場一片笑聲。

林太罕有以特首身分出席民主派組織晚宴,佢噚晚致辭後就趕赴下一場活動,無時間食飯,至於曾俊華作為「退休人士」就輕鬆得多,逗留近一個半鐘先離場。

其他報道:【Emily online】反釋法遊行案預審 主控派17光碟無列表 大狀較勁徒弟能力 

其他報道:【Emily Online】林太好想煮飯仔、去旅行 但無悔做特首

其他報道:被問彭定康會否不獲入境 林鄭:不排除任何可能

 

相關字詞﹕公共專業聯盟 林鄭月娥 曾俊華 編輯推介

上 / 下一篇新聞