港聞

【Emily online】反釋法遊行案預審 主控派17光碟無列表 大狀較勁徒弟能力 (18:24)

社民連主席吳文遠聯同其他8個社運人士,涉嫌喺舊年11月反釋法遊行中衝擊警方防線,轉去中聯辦示威,結果被控煽惑他人擾亂秩序同非法集結等控罪,案件今日再預審。主控官喺預審前兩日,突然向辯方大狀派多17隻CD,裏面載有超過6個半鐘嘅涉案片段,仲要講明係庭上會用到嘅材料,辯方大狀個個都話睇唔晒。

其他報道:【佔旺案宣判】案件押後判刑 壽星仔黃之鋒獲支持者唱生日歌

辯方大狀郭憬憲要求主控官整一個列表,列明邊一部分嘅片段係針對邊一個被告,仲要有埋截圖,等辯方可以睇得更有效率。主控官應承辯方會準備一份列表,但需要大概一個月時間完成。

郭憬憲同意畀多一個月時間,但似乎對控方嘅做事效率有不滿,串對方「我會畀我徒弟2日時間(做表)」,另一個辯方大狀石書銘則笑言自己冇郭憬憲咁苛刻,「我會畀多啲時間」。主控官聽到之後,仍然面露笑容,但似乎有啲尷尬喎。

薑係老嘅辣,資深大狀李柱銘亦要「插多腳」,話「如果係我徒弟,噚日就應該做好」,莫非係暗諷主控官應事先做好功課?庭上爆發笑聲,就連加入辯方法律團隊嘅港大學生會前會長梁麗幗,聽到李柱銘嘅妙語後,都忍唔住掩口大笑。

其他報道:周永康獄中信予梁麗幗 提蔡若蓮喪子標語 盼馬斐森歸英「守護學術自由」

其他報道:【佔旺案宣判】岑敖暉料監禁可能性不低 斥林鄭一步步推青年往深淵

相關字詞﹕反釋法遊行 法庭 李柱銘 梁麗幗 編輯推介

上 / 下一篇新聞