港聞

【Emily Online】蘇敬恆被拒入政府? 林鄭:不評論個案 吸青年議政以多元為主 (20:23)

特首林鄭月娥今日發表佢上任首份施政報告,當中提到增加青年人參政機會。佢晚上出席電視論壇亦繼續讚揚香港年輕人好優秀,希望多啲吸納唔同年輕人加入政府。

不過在場有記者行家就問到政府請人係咪真係不分立場,追問「有一個行家畀局長睇中做政治助理,但後來因建制派聲音而未能加入政府,其實政府點樣選擇人選?」講緊嘅係做開《城市論壇》主持嘅傳媒人蘇敬恆,佢原本有機會擔任食衛局政助,但有傳因為建制派反對而觸礁。

林鄭月娥回應時就話唔可以評論每一個個案,但就話獲聘要視乎個人質素、品格資歷同埋應徵位置,「你話參選行政長官,要求就非常之高啦」。不過林太強調,會特別畀多啲年青人參政論政,吸納佢哋會以以多元為主,唔同政見嘅人都能加入委員會,以及中策組改組後變成嘅「政策創新與統籌辦事處」。

行家再追問,係咪政治委任嘅位置,如果同建制派關係唔好嘅人,就唔使諗呢?林太就即舉入政府前係民主派嘅勞福局長羅致光做例子,話「佢都做到局長啦」,不過佢亦補充話,既然做得政治委任官員,就要有團隊精神,因為政府係行政治問責制,如果唔同意政策,個人係要負責,但佢就話唔等於以前有對民主同政府唔同睇法嘅人,就唔可以加入政府。

施政報告相關報道:

林鄭:青年有本土情懷無問題 勿以參政做藉口違法

中策組改組公開招聘青年 林鄭:政治立場非特別因素

林鄭:修補社會撕裂靠實際行動 非靠文章篇幅

相關字詞﹕編輯推介 林鄭月娥 蘇敬恆

上 / 下一篇新聞