港聞

【Emily Online】諾獎得主莫言、利豐主席馮國綸 將獲浸大頒榮譽博士 (22:17)

浸會大學宣布,將會喺11月3日頒授榮譽博士學位畀5名傑出人士,當中包括曾奪諾貝爾文學獎嘅莫言、利豐主席馮國綸、消委會前總幹事陳黃穗、哈佛大學講座教授柯偉林,同埋牛津大學數學、物理及生命科學學部主任Donal Bradley。

浸大話,頒畀上述5名人士,係想表揚佢哋嘅卓越成就同埋對社會嘅重大貢獻。Emily一睇,當時拎諾獎時喺文化界各有意見嘅莫言(本名管謨業)都有份,原來佢同浸大都有啲淵源,喺2008年時、未拎諾獎之前,莫言已經憑《生死疲勞》獲得浸大紅樓夢獎嘅世界華文長篇小說獎。

另外,利豐主席馮國綸都獲銜,浸大話馮旗下嘅基金會慷慨捐資浸大,成立馮漢柱基金全人教育講座教授席、馮氏獎學金同埋馮氏服務領導計劃等。至於陳黃穗,佢除咗喺消委會前總幹事,仲曾任教資會委員,喺2013年至2016年仲做過浸大校董會暨諮議會副主席,同埋人事管理委員會主席等。

柯偉林就同本港高等教育關係密切,除咗係教資會委員,仲曾為港大撰寫大學管治專責小組的報告書,當中建議考慮取消特首任校監必然制。

其他報道:青山道東亞分行誤棄支票箱 籲上周六曾使用者聯絡

其他報道:通訊局令無綫明年7月3日起 每日播手語傳譯粵語新聞

相關字詞﹕編輯推介 浸大 榮譽博士 諾貝爾文學獎 莫言

上 / 下一篇新聞