港聞

【Emily Online】譚志源跟番阿松打工 加入創投公司新風天域 (17:36)

休息咗一排嘅前任政制及內地事務局局長譚志源有新動向,根據前任行政長官及政治委任官員離職後工作諮詢委員會嘅資料,Raymond Tam十月一日起會出任新風天域醫療副主席、新風天域教育主席,睇番資料,創投公司新風天域喺2016年成立,由香港前財政司長、現南豐集團董事長兼行政總裁梁錦松及前黑石董事總經理吳啟楠二人牽頭。Raymond Tam同Emily講,佢主要喺內地工作,要去上海、成都同廣東。

其他報道:【公僕夫婦墮斃】上周情變男死者搬走今凌晨回家 女死者頸背有刀傷 警列謀殺自殺案

阿松當年做財爺時,Raymond Tam係佢嘅新聞秘書,當日大家一齊拍住上,直至阿松因為偷步買車風波後辭職,其後政務官出身嘅Raymond,願意做問責官員,喺官場步步高升,位高至局長,但佢並沒有留下現屆政府。估唔到最後跟番阿松再續前緣。

新風天域集團主席梁錦松透過新聞稿話,好高興Raymond加盟新風天域,又話佢上任後首要任務將推動新風天域醫療業務增長,成為全國領先嘅醫療集團,並且加快新風天域教育平台建設。阿松話Raymond係佢喺政府工作時嘅舊同事,有豐富公共服務經驗,能力強而智謀多,非常高興同佢再一齊共事。

Raymond喺新聞稿話,非常認同和支持阿松所構想嘅集團策略發展方向以及企業所應承擔嘅社會責任與目標;作為新風天域的成員,期待在新崗位上發揮能力,為國家的社會和經濟發展作出貢獻。

另外,委員會亦同意食物及衞生局局長政治助理陳凱欣出任好聲服務有限公司行政總裁。職位由本月15日起生效。

其他報道:男教師涉非禮女生 疑轉職特殊學校 鄺俊宇指教局未確認去向

其他報道:【公僕夫婦墮斃】死者伏屍兩單位平台 一戶主拒警取道屋內搬屍

其他報道:【多圖】中大學生會民女像掛「政治犯名單」 遺憾校方拆港獨橫額

相關字詞﹕編輯推介 梁錦松 譚志源 創投 新風天域

上 / 下一篇新聞