港聞

【Emily Online】天鴿來襲fb開報平安專頁 網民另類求助「幫手做暑期功課」「需要溫暖」 (21:27)

「天鴿」襲港,香港受暴風雨影響,全日消息滿天飛,各處流傳有水浸、爆窗等事故。近年全球發生多個恐襲事件,Facebook都會喺事發後開一個報平安專頁(Facebook Safety Check),今日亦都為颱風「天鴿」開咗一個,等用戶可以喺fb話畀朋友知自己係咪安全,或者畀有需要嘅人求助同提供協助。

有網民喺呢個專頁度求助,話自己條村出面條大渠畀雜物整塞咗,搞到有大量水倒灌入屋,希望問其他人有無抽水泵可以借用。

不過有網民亦提出咗一啲疑幻似真嘅求助,例如「需要溫暖」、「需要大量金錢」、「求解悶良方」,甚至「幫手做暑期功課」,又有人感嘆「昨日set好既(嘅)髮型 今日比(畀)天鴿吹到走晒樣 搞到我好頭痛呀!」同時有網民自發提供另類協助,話「本人可以幫你清理因打風而買多左(咗)的零食」。

Emily相信有啲網民發帖都係搞吓笑啫,不過都希望唔會阻到真正有需要嘅人求助啦!

相關專頁:https://www.facebook.com/safetycheck/typhoon-hato-aug22-2017/

相關報道:

【多圖:天鴿離開】垃圾隨浪沖上杏花邨 居民自發清理

【天鴿來襲】市民海上行車 風浪拍打車窗  網民笑指「摩西分紅海」 另有斥「不負責任」

【天鴿來襲】返工後才掛九號波 早班店員幸避惡劣天氣

【天鴿來襲】吊船鬆脫撞爆3單位窗戶 昇御門:事前已採取必要措施鞏固

相關字詞﹕編輯推介 天鴿 打風 颱風 報平安

上 / 下一篇新聞