港聞

下一篇
上一篇

【Emily Online】蔡若蓮上任即封fb?半年帖文消失 反任命大學生一度不能看帳戶 (17:44)

教育局副局長、教聯會前副主席蔡若蓮今天履新。反普教中團體「港語學」召集人陳樂行同Emily講,今早開始就瀏覽唔到蔡若蓮嘅個人facebook,懷疑被佢封鎖咗,陳樂行質疑,「新上任首天即block我,又話會聆聽學生意見?」Emily就即刻去蔡若蓮fb睇睇,仲見到佢近期嘅帖文,不過隔咗一陣,就只係見到上年年尾及以前既帖文,近呢半年嚟嘅帖文都唔見咗,唔知蔡副局fb因咩事變到咁呢?

其他報道:6議席一或兩次補選? 聶德權稱9月較明朗

蔡若蓮出任教育局副局長嘅消息早前傳出後,喺教育界引起反響。早前「港語學」等團體去到教聯會會址抗議蔡若蓮嘅任命,而蔡若蓮今早在教育局長楊潤雄陪同下見記者,佢話明白香港有多元化意見,未來會以「平常心、虛心」聆聽不同意見,加強同業界、教師及學生交流。

反普教中團體「港語學」召集人陳樂行就同Emily講,今早發現自己個人fb帳戶唔可以瀏覽蔡若蓮嘅個人fb,只顯示:「你前往的連結可能已過期,或是你不屬於讓頁面限定的分享對象」,覺得十分錯愕,令佢質疑「蔡若蓮上任第一件事就是block(封鎖)我,好小學雞」。

Emily即刻去蔡若蓮fb睇,仲見到佢上星期六(7月28日)發布同小朋友影嘅相,不過隔咗一陣,就只係見到佢上年12月26日上載嘅離島照片,同埋此前嘅帖文,近半年嘅帖文都唔見咗。而陳樂行下午5點再嘗試時,就成功去到蔡若蓮fb,不過同Emily一樣,都淨係見到上年之前嘅帖文。

教育局發言人回覆Emily話,蔡若蓮正考慮設立一個facebook帳戶或專頁,加強同各界聯繫溝通,至於佢原有嘅個人facebook帳戶,主要係同親友作生活交流之用,唔會用於現時工作相關職務。

其他報道:立法會刊憲宣布4議席出缺

其他報道:「死忍」多時 吞鑽疑犯今晨終排出6粒鑽石

其他報道:補習導師打瘀學生臀 判100小時服務令

相關字詞﹕教育局 蔡若蓮 港語學

上 / 下一篇新聞