港聞

【短片:Emily Online】林鄭工總晚宴致辭搞gag:李家超局長嚟呢度做咩? (21:53)

香港工業總會今日選出新一屆理事會成員,身兼勞工顧問委員會嘅原副主席郭振華獲選為主席,主席團有3人係內地政協。工總周年晚宴邀請到特首林鄭月娥,林太輕鬆「搞gag」,取笑到場約半個鐘就走嘅財政司長陳茂波,係驚佢「點名」特登嚟「打卡」,又話保安局長李家超係嚟同大家講「高鐵可一地兩檢開通」喎。

其他報道:【多圖】解放軍酒會 董建華梁振英林鄭同場 大批官員政商界出席

今次晚宴政商界名人雲集,啱啱去完中環軍營嘅特首林鄭月娥轉到會展捧場,同場仲有財政司長陳茂波、食衛局長陳𦘦始、商經局長邱騰華、保安局長李家超、政制及內地事務局長聶德權,同埋創科局長楊偉雄。立法會主席梁君彥同經民聯立法會議員林健鋒都有到場,佢哋分別連任工總嘅留任理事同選聘理事。

林太喺致辭時話,1司長5局長到場體現新政府嘅團結精神,又逐個介紹政府官員,不過介紹到李家超時,林太就話自己搲晒頭,「嚟呢度做咩呢」,之後笑笑口話,「(李家超)係嚟話畀大家知,廣深港高鐵可『一地兩檢』開通」。

不過,Emily發現林太數漏咗一位局長,就係勞福局長羅致光(CK),但CK淨係同新主席郭振華打聲招呼就離開,冇留低享用晚宴,咁就同林太「緣慳一面」喇!

工總2017至19年度理事會主席團成員,包括主席郭振華,副主席嚴志明、葉中賢、楊悰傑、查毅超同埋陳祖恒。當中郭振華、嚴志明同查毅超分別係湖南、廣西同重慶嘅政協委員。郭振華代表工總發言時話,希望把握「一帶一路」為香港帶來嘅新機遇。

對於取消強積金對沖新方案,建議政府協助僱主儲錢支付長服金同遣散費,郭就話業界仲等緊政府嘅數據,未知儲幾多先足夠。

其他報道:中大深圳畢業證書曝光 校友:樣式與香港中大極相似

其他報道:街馬辦跑步賽 邊飲啤酒邊跑 醫生指或增跌倒受傷風險

相關字詞﹕特首 行政長官 林鄭月娥 李家超 保安局 工總 工業總會 財政司 陳茂波 高鐵 一地兩檢 政協 編輯推介

上 / 下一篇新聞