港聞

【Emily Online】城市論壇主持蘇敬恆 傳已遞信辭職做政助 (20:42)

特首林鄭月娥嘅新班子上場接近一個月,但副局長、政治助理等人選到而家都只聞樓梯響。Emily四周打聽之下,有傳香港電台電視節目《城市論壇》主持人蘇敬恆,將會出任食物及衛生局政治助理。

其他報道:未經公開招聘 規劃署前署長任保育大嶼統籌 前下屬有份遴選

Emily打過畀人稱「蘇B」嘅蘇敬恆,向佢求證呢個消息。佢無正面回應,只係話「多謝大家關心,希望大家繼續支持城市論壇同香港電台」。

據了解,羅致蘇B加入問責團隊只係近期嘅事,佢已經遞咗辭職信,由於佢本身喺公務員,仍需要一定時間先可以完成程序。至於新主持人嘅人選同接手事宜,蘇B都係今日先同上司商討。

蘇B曾經喺無綫電視新聞部、香港電台電台新聞部出任記者,及後轉職至港台電視台,從事傳媒工作多年。佢前年9月接替謝志峰出任城市論壇主持,至今差唔多兩年時間。湊巧嘅係,城市論壇嚟緊嘅星期日會係今年「抖暑」前最後一集,節目主持依然係蘇B,講嘅題目就係「一地兩檢」。

港台發言人就話,所有公務員請辭都需要根據程序。

其他報道:【多圖:動漫展開鑼】Cosplay迷千元裝身 雷電、布歐紛現身

其他報道:【4議員DQ】4人在民主派陪同下離開立法會 高呼「我會回來」 長毛:民主派沒有分裂的本錢

相關字詞﹕城市論壇 蘇敬恆 一地兩檢 政治助理 編輯推介

上 / 下一篇新聞