港聞

【Emily Online】羅致光上任前賣光股票 笑指「呢半年人工都唔夠我蝕啲錢」 (18:58)

人稱CK嘅勞福局長羅致光上任後同傳媒茶聚,被記者問到佢知唔知自己幾時出糧,佢就話自己都唔知,又順帶提到,做問責官員要申報資產,自己已經喺上任前將手頭上所有股票賣晒,笑言「呢半年人工都唔夠我蝕啲錢」,又指「錢銀升降係浮雲」;佢話總共15至20隻股票,有能源、運輸、物流同金融地產等。Emily睇返資料,現時局長月薪有30多萬,半年薪酬超過180萬。

政務司長張建宗就任勞福局長時,被人戲稱喺「標準長工時局長」,Emily問佢一日工時幾長,CK就話唔覺得自己份工有返工同收工時間,即使係過去大學教書時都一樣,任何時間都做緊嘢。佢話,每日大約7點半返到辦公室,如果當日無特別事,就會6點幾離開辦公室,因為唔走同事無得走。

CK舉例,有時會朝早5點幾傳電郵,又會夜晚10點幾先傳,間中都會同同事講,可以唔洗理我電郵,但都好難叫同事唔理上司電郵。

佢話仲適應緊,因為自己習慣任何嘢發生咗就要做,舉例前排有個諗唔通嘅難題,朝早5點幾訓醒突然諗通,就即刻傳電郵。行家問佢上任後有無放過假,佢話自己有游咗幾次水,都有睇過戲。

其他報道:【警涉偕妻騙案】事主指被告曾稱炒勞力士可賺1.6萬 卻從未找數

其他報道:IPAC報告:近50在港印傭或涉極端思想

其他報道:【一地兩檢】再多兩市民提覆核 憂站內示威被視為尋釁滋事 

相關字詞﹕勞福局長 羅致光 編輯推介

上 / 下一篇新聞