港聞

下一篇
上一篇

【短片:Emily Online:香港書展】古天樂出席《尋秦記》作家講座 北京女稱聽唔明要求講普通話 (18:51)

書展踏入第2日,今日上下午都有多場講座。其中兩位同已故玄幻武俠小說家黃易都甚有淵源嘅人,即係歷史博物館前館長丁新豹同埋演員古天樂,今日就一齊出席《不負此生——日月當空思黃易》講座。講座期間有內地女子突然企起身話聽唔明,叫古天樂講普通話。古就話無問題,問現場仲有無歐洲、法國嚟嘅朋友,有咩要求,佢都可以滿足。

相關報道:聞議員DQ、壹週刊賣盤感興奮 屈穎妍:小鳳姐成日都出場

黃易生前名作有《尋秦記》、《大唐雙龍傳》等,並曾經做過香港藝術館助理館長,今年4月因病去世。貿發局就邀請到黃易舊同事、歷史博物館前館長丁新豹,以及曾主演電視劇《尋秦記》嘅演員古天樂,今日一齊出席有關黃易嘅講座。

丁新豹大講同黃易喺藝術館做同事嘅趣事,佢話黃除咗係出名嘅作家,仲係一個睇相佬,平時都會幫啲同事睇掌,以前中午食飯嗰陣,都有好多同事嚟搵黃易睇掌。

丁新豹又話,佢哋成班同事都係怪人,個個都神神化化,好玩得,有時玩起上嚟,會喺午飯後舉打字機當做運動,仲會賭如果舉到幾多吓就可以有漢堡包食。

古天樂就話,佢同黃易食過一次飯,當時見佢打扮好似世外高人,都唔係太敢同佢傾偈,但認為黃易當年能夠寫出穿越劇,係好厲害嘅事。

講座期間就發生咗小插曲,有位自稱來自北京嘅女子,突然舉手同企起身,又用英文同普通話話聽唔明,叫古天樂講普通話,古天樂就用一貫嘅普通話水平回應話,相信主辦單位有錄影,最後會播出,到時應該有字幕,叫佢睇字幕。

不過,古天樂最後亦好好,問大家有咩要求,現場仲有無歐洲、法國嚟嘅朋友,有咩要求,佢都可以滿足,總結時講咗一小段普通話,話好榮幸可以參演,多謝黃易。

其他報道:【圍校委案】李柱銘代表馮敬恩求情 哽咽讀馮母求情信

其他報道:配合港珠澳橋通車 青嶼幹線8月20日起雙向收費

相關字詞﹕香港書展 書展 尋秦記 黃易 古天樂 丁新豹 科幻小說 歷史 穿越 普通話

上 / 下一篇新聞