港聞

【短片:Emily Online】開會變開火 黃碧雲劉國勳互鬧「躝癱」「潑婦」 (18:49)

唔少人都關注,究竟政府幾時會就梁頌恆、游蕙禎,以及上星期五法院裁定羅冠聰、劉小麗、姚松炎及梁國雄嘅議席進行補選。立法會政制事務委員會今日開會,雖然議程係傾日後立法會選舉實務安排、區議會增加議席等,但泛民議員都把握機會問補選問題,點知演變成民主黨黃碧雲及民建聯劉國勳對罵,會議休會作結。

其他報道:自稱公民記者男脫罪 庭外稱未還公道:警誣告應承擔責任 憂砌人生豬肉成常態

會議去到「其他事項」時,黃碧雲要求政府交代補選安排,委員會主席廖長江質疑提問與會議議程無關,官員可選擇是否回應。政制及內地事務局長聶德權就話,梁游案8月底終審法院會決定是否批出上訴許可;上星期五法院判決4人未知會否上訴,政府會密切關注事件發長,並考慮人手、場地及公帑是否有效運用等因素,目前未有決定。

黃碧雲要求對方承諾將梁游議席及「DQ4」議席唔好綑綁處理,主席再次質疑問題與議程無關,黃就直斥「主席你唔好成日擋住官員作答啦」,但廖長江堅持黃唔應該問議程無嘅問題,一人一句下廖長江直言「請你收聲」,並著劉國勳提出問題。

劉國勳隨即揶揄,唔明白點解咁急要就「DQ4」提問,形容4人係咪上訴都未知,「民主黨咁快就吼住補選」係無需要,黃碧雲隨即大聲批評劉胡亂猜測佢動機,要求對方收回及道歉。劉國勳強調只提及「民主黨」、唔一定係講黃碧雲,但黃碧雲就話會內得佢一個民主黨成員,主席認為劉國勳無違反議事規則,黃碧雲就狠批廖長江偏袒劉,主席多次熄咗黃碧雲個咪,仍無礙佢繼續發火,喺座位大鬧。

黃碧雲後來更大鬧,「民主黨抗議民建聯呢個『躝癱』喺呢度隨便含沙影射民主黨」。劉國勳亦不甘示弱,「好心啦,人哋解釋咗議事規則畀你聽,唔好一舊雲啦你,成個潑婦咁」,及後黃碧雲強烈抗議,兩人對罵下,最終廖長江指唔認為會議可以繼續進行,宣布休會。

其他報道:【壹週刊賣盤】工會:如痛失手足 管理層欠員工一個交代

其他報道:【壹週刊賣盤】CEO向員工保證非為「維穩費」售予黃浩

其他報道:【公院迫爆】伊院稱「極度嚴峻」 急症室安排入院平均等逾24小時

相關字詞﹕編輯推介 黃碧雲 劉國勳 民主黨 民建聯 梁頌恆 游蕙禎 羅冠聰 劉小麗 姚松炎 梁國雄

上 / 下一篇新聞