港聞

【短片+多相:Emily Online】林鄭司局長高調幫DSE考生打氣 獨欠袁國強邱騰華 (20:26)

聽日就係中學文憑試DSE放榜,行政長官林鄭月娥今日返去母校嘉諾撒聖方濟各書院,幫師妹們打氣。除咗林太之外,尋日同今日仲最少有2位司長同12位局長,忙住去唔同嘅中學或者喺facebook為應屆考生打氣。政府三司十三局入面,暫時就淨返律政司長袁國強,同埋商務及經濟發展局長邱騰華,仲未有打氣片段或者相片「流出」。不過忙嘅唔止司長同局長們,佢哋嘅新聞主任(IO)都一樣咁忙,因為今日Emily不停收到好多IO電話,打嚟通知話局長去學校支持同學仔呀!

相關報道:【短片+多相:DSE放榜】多名局長返母校為師弟妹打氣

林鄭月娥今朝早出席行政會議之前,已經呼籲應屆考生以平常心面對成績,強調香港有多元出路,祝福同學可以各展所長。佢之後就返去母校嘉諾撒聖方濟各書院支持一班師妹,提佢哋可以多啲向家人同老師分享感受,最緊要對自己有自信,「未來嘅前途係美好嘅!」

除咗林太,財政司長陳茂波都有返去母校天主教培聖中學,幫師弟妹打氣;而教育局長楊潤雄、保安局長李家超、發展局長黃偉綸、財經事務及庫務局長劉怡翔、運輸及房屋局長陳帆、民政事務局長劉江華,同埋政制、內地事務局長聶德權,噚日同今日都分別返去佢哋嘅母校為師弟們打氣——點解Emily淨係講師弟唔講師妹呢?因為幾位局長讀嘅都係男校,自然就無師妹啦!被稱為「星星局長」嘅環境局長黃錦星,都有返去母校為師弟妹打氣㗎!

至於食物及衛生局長陳肇始雖然無去母校聖保祿中學幫師妹打氣,不過就去咗姊妹校聖保祿學校(St. Paul's Convent School)支持同為「Paulinians」的師妹,仲去咗隔籬何東中學幫聽日放榜嘅同學打氣。勞工及福利局長羅致光就喺勞福局facebook幫英皇書院嘅師弟打氣,仲引用校歌歌詞鼓勵同學㖭。

值得留意嘅係創新及科技局長楊偉雄,佢雖然生於台灣、留學美國,但都一樣有DSE考生心,今日去翁祐中學參加畢業頒獎典禮時,都不忘鼓勵聽日放榜嘅同學要樂觀面對。而公務員事務局長羅智光,就去咗仁濟醫院王華湘中學支持一班同學。

政務司長張建宗雖然無去學校,但就去咗「太陽計劃」嘅活動,同樣係為聽日放榜嘅DSE考生打氣。

Emily回想自己放榜當日,緊張到連成績單都要勞煩老師幫手睇,希望聽日放榜嘅考生們盡量放鬆下,祝福你哋聽日一切順利!

相關報道:聯招選科懶人包 助學生增取錄機會

其他報道:【中一派位】基層學生獲派第一志願 興奮又滿意

其他報道:烈日下送別遼寧號 小學生獲派退熱貼防中暑 市民為解放軍撐傘

相關字詞﹕dse放榜 文憑試 放榜 局長 母校 特首 行政長官 林鄭月娥 打氣 編輯推介

上 / 下一篇新聞