港聞

【Emily Online】建制議員獲邀上遼寧號甲板 撞正財會憂泛民「偷襲」 (22:09)

中國第一艘航空母艦「遼寧號」聽日訪港,可惜一票難求,要親身去睇都唔係咁易,即使係政界人士都唔例外。官方聽日朝早會舉辦歡迎儀式,夜晚則喺遼寧號舉行甲板招待會,唔少立法會議員今日終於收到邀請,部分民主派議員獲邀出席早上歡迎儀式,建制派則收到邀請出席晚上嘅招待會,但由於舉行時間係7點至9點,獲邀者須於下午5時50分登船,時間撞正財委會會議,搞到好想去遼寧號嘅建制派都好頭痕。

其他報道:女律師疑知法犯法 庭內拍照上載fb稱「不可拍攝」

唔少建制派都好想參觀遼寧號,但過去幾日只得身兼人大代表、政協或行會成員等身分嘅人獲邀,直至今日下午,其他建制派終於收到邀請出席甲板招待會,搞到佢哋都好興奮,雖然撞正財委會開會,但有建制派同Emily講,一定會出席招待會,直言「人一世物一世」,梗係去睇航空母艦啦!

另一名建制派亦話,機會非常難得,但財委會要審議南港島線東段嘅撥款議程,相信泛民會反對撥款,所以唔可以掉以輕心,希望建制可以分下工,部分人參觀遼寧號,部分人就留守財委會。不過,究竟有無足夠建制派願意犧牲做留守開會嘅議員,令泛民唔可以「偷襲」呢?

至於泛民方面,公民黨黨魁楊岳橋、陳淑莊、民主黨主席胡志偉、林卓廷、鄺俊宇等亦收到特區政府發出邀請,楊岳橋話獲邀出席早上嘅歡迎儀式,但佢唔會出席喇。

其他報道:【多圖:香港第一架】西九引入無人電動車 試行700米限速15公里

其他報道:做外遊局長? 教育局長楊潤雄:一個月一次,我諗機會好細

其他報道:林鄭稱千人聯署反蔡若蓮任教局副局「好少」 指不應以有色眼鏡看官員人選

相關字詞﹕遼寧號 立法會 財委會 泛民 建制派 編輯推介

上 / 下一篇新聞