港聞

下一篇
上一篇

【Emily Online】鍾樹根fb貼圖稱打水光槍1800針 保鮮紙罩面嚇親網民 (22:42)

貪靚係女人嘅天性,但原來民建聯前議員鍾樹根都好貪靚。佢今日就喺facebook貼咗張接受水光槍治療嘅相,仲話喺面上打咗成1800針,另一張相就見佢塊面包咗保鮮紙,原來係打針前敷麻醉膏。唔少網民都問樹根退隱之後係咪轉行做代言人,不過有網民就話有少少畀佢啲相嚇親,如果搵佢宣傳效果唔係咁好咁話。

相關報道:有美容中心由非註冊醫生注射「水光槍」 注射風險你要知

近年坊間興起水光槍美容,其實係以多個微細針頭,將透明質酸或其他針劑逐少注射入皮下嘅真皮層,以達致補濕和改善皺紋效果。

鍾樹根今日喺fb就話,自己無做議員之後去咗耕田,但日曬雨淋,搞到皮膚傷曬。所以就走咗去打水光槍,仲全程影哂相畀大家睇。鍾樹根話全塊面打咗200槍,每槍9針,即係夾埋有1800針咁多!Emily望住佢打緊針個張相覺得有啲驚險,不過鍾樹根就另外貼咗一張全面包曬保鮮紙嘅相,話打針之前有敷麻醉膏先。

有網民留言就話做完望落無咩分別,鍾樹根就回應話因為佢成日都做,保持青春,亦有網民打趣咁話,「樹根一定要吸收水分」,鍾樹根都答佢「對啊」。

Emily睇返之前嘅報道,原來消委會有叫過大家打水光槍之前要三思,因為水光槍療程係入侵性美容程度,一定要確認療程係由具專業資格嘅醫護人員執行。另外,唔同品牌嘅針劑,品質可能會參差,胡亂混合成分不明、配方複雜嘅針劑可能會產生不良反應。如果注射程序不當或者唔安全,輕則影響儀容,嚴重可能會過敏、感染,甚至造成永久性疤痕,睇嚟樹根都真係要小心呀。

其他報道:【網上熱話】牛肉麵店加價稱較台北食店便宜 店主回應質疑重申真材實料 食客力撐:唔加仲怕你執笠

其他報道:【網上熱話】新華社慶回歸歌廣東話版被批唔啱音 網民:「專奄富強」「二十年燴芒」令人失笑

相關字詞﹕鍾樹根 水光槍 消委會 編輯推介

上 / 下一篇新聞