港聞

下一篇
上一篇

【Emily Online】53年前一段故 譚志源係林子祥爸爸經手 (13:11)

政制及內地事務局長譚志源同歌手林子祥有咩關係?譚志源今朝喺電台節目爆出一段陳年舊事,原來佢當年出世係林子祥爹哋經手嘅!

其他報道:譚志源回望仕途最低潮 買車事件受冤屈打算「不如走人」

呢屆政府僅餘下兩個星期任期,早已講明唔留任嘅譚志源今朝出席新城電台節目,少不免講到佢30年來仕途種種。今年53歲嘅佢由自己出世講起,原來局長唔係喺醫院出世,而係喺元朗一位姓林醫生嘅診所出世,到佢大個咗,媽媽同佢講原來嗰位醫生係林子祥嘅爸爸。之後有次佢見到林子祥,就同對方講,「我出世係你爹哋接生」,林子祥就講笑咁話,「哦,你係我爹哋經手嘅…」

譚局長又話,佢由細到讀大學之前,都係喺元朗長大,但唔係原居民。佢入港大讀工程,但發覺唔係自己嘅興趣,後悔啦,反而投入好多時間搞宿生會。畢業後,亦有申請過工程相關工作,但最後只有政府請佢做AO,佢笑住話「命中注定一定做呢行,一入侯門深似海」。

兩星期後就告別工作咗30年的政府團隊,作為基督徒嘅譚志源話信仰對自己嘅工作一定有影響,佢以兩句話總結30年公職生涯:「順景感恩,逆境忍耐」。

譚志源話,順景感恩,係講人就算做得順、升得快,但要明白唔係自己努力就得,仲有好多其他因素,甚至唔係人為因素,係上天喺某時空畀你嘅際遇,令你領略上天對你嘅心意。

至於逆境忍耐,佢話當挫折時唔應該放棄,因為挫折會令自己成長得更好,經一事長一智,喺邊度跌低就喺邊度站起嚟,用呢啲經驗造就以後嘅自己同身邊嘅人。

局長話,信仰畀到佢力量,明白有時心想做嘅未必事成,但深信歷史發展有上天嘅心意,人所要做嘅就係盡力而為,問心無愧,其他就係上天旨意,咁會令人心態上自在好多、平安好多,面對不確定性時亦容易好多。

其他報道:林鄭稱特首唔易做 強調如實反映中央香港意見 再為丈夫「一國兩制」情書平反

其他報道:新班子多公務員林鄭稱毋須磨合 上任首周公布50億教育撥款措施 笑言平反「大逃亡」之說

其他報道:羅范椒芬:中央香港非河水不犯井水 望年輕人按事實講道理看待一國兩制

相關字詞﹕編輯推介 譚志源 emily online 林子祥

上 / 下一篇新聞