港聞

下一篇
上一篇

【Emily Online:打風了】南港島線轉手動駕駛 職員上車問車長:使唔使食嘢? (21:38)

舊年12月啟用嘅港鐵南港島線,列車一向都係自動操作,不過今日「苗柏」襲港,天文台掛起8號風球,南港島線都轉咗人手操作,由車長控制開關門甚至行車速度,南區區議員區諾軒喺facebook話,見到有站務員上車問車長「使唔使食嘢」呀!

相關報道:【不斷更新】颱風天特別措施安排

Emily去南港島線睇過,見到列車車頭一角圍起咗塊布幕,上面寫住大大隻字寫住「請勿打擾」,下面仲有兩行細啲嘅字,話「車務人員正處理事故,我們會盡快通知各位最新的車務狀況」,原來就係車長喺入面控制緊列車。Emily問過喺入面嘅車長,佢話除咗操作列車開門、閂門之外,佢仲會控制埋車速㗎。

區諾軒今晚都喺facebook上載咗一張相,話第一次喺南港島線見到「司機位人手開車」,列車駛到黃竹坑站時,更加有站務員上車,揭開圍住車長位置嘅布幕,問車長「使唔使食嘢」,不過車長可能為咗專心控制列車,只係好簡單答咗句「唔使」就算喇。區諾軒就藉佢個post感謝喺打風時為市民服務嘅人。

不過喺區諾軒個post下面,有網民留言質疑點解天氣惡劣時,要將南港島線改用人手操作,仲要用布幕圍住車長,擔心係咪列車設計或製造出問題,有其他網民就幫手解畫,話南港島線唔少位置都係露天,所以喺惡劣天氣下行車,就要派車長睇住列車前面有無障礙物等,而且自動操作系統好多時都處理唔到緊急狀況,因此天氣惡劣時都係搵返車長操控列車好啲。至於拉布幕遮住車長,就係避免乘客干擾到車長駕駛,同埋避免列車玻璃喺黑暗嘅隧道入面反光。

相關報道:

天文台改掛8號西北烈風或暴風信號 苗柏料橫過本港東部

港鐵站逼到實 觀塘線一度延誤

8號風球生效 政府夜間普通科門診暫停服務 

相關字詞﹕打風 颱風 風暴 熱帶氣旋 熱帶風暴 苗柏 天文台 港鐵 南港島線 車長 自動 手動 交通 編輯推介

上 / 下一篇新聞