港聞

【Emily Online】14架美食車組大聯盟「自救」 龍舟嘉年華首度齊同場 巿民反應理想 (21:49)

香港龍舟嘉年華一連三日喺中環海濱舉行,同場亦有啤酒節,同埋美食車嘉年華,今次係美食車計劃啟動以來,首度有齊14架美食車同場,市民可以免費入場,一邊欣賞龍舟比賽、聽音樂,一邊品嚐美食。

其他報道:置業負擔比率升至66% 張炳良憂慮樓價日趨非理性 指與購買力脫節

雖然有美食車喺今個星期初宣布退出計劃,但無礙一眾車主參加嘉年華嘅心情。14架美食車車主早前組成大聯盟,希望靠自己力量多啲宣傳。主打港式及潮式小食嘅「豪園小食」負責人梅樂文認為今次活動氣氛好好,對於首次見到14架車同場,佢好開心話:「終於唔使好似以前孤兒仔咁樣。」

梅樂文話,會繼續以雞翼做主打,今次特登喺韓國入口味粉、醃料,預備咗6000隻雞翼,希望可以做多啲生意;今日開檔大約個幾鐘,已經做到約2000蚊生意,成績唔錯,希望未來兩日都天公作美。

主打菠蘿包嘅「菠蘿仔食堂」負責人林潔惠就話,呢3日嘅活動中,每日預備咗800個菠蘿包,比平日多200至300個,對生意感到樂觀。

另一架美食車,以黯然銷魂漢堡為主打嘅「七桌子×樺得園」負責人林瑞華認為,美食車應該要多參加呢類大型活動,令現場增添熱鬧氣氛,而美食車聯盟未來會接更多活動,亦已經與大埔回歸音樂會合作,會喺今個月30號,派出7架車到場,又有10幾間商場及唔同機構接觸聯盟,希望邀請佢哋舉辦活動,所以佢表明暫時都唔會諗退出計劃。

來自澳洲嘅遊客Gwyn就話,今次係1993年後首次再嚟香港,事前無收到呢個活動嘅宣傳,只係喺搭巴士經過中環發現呢到有大型活動,所以就過嚟睇下。佢話喺澳洲幾乎每個大型活動都有美食車,活動令佢諗起澳洲,覺得氣氛好好,食過腸粉,覺得好好味,仲會試其他嘢食。

港人董小姐就同朋友收工之後過嚟,佢話係畀啤酒節吸引,嚟到又見到美食車,覺得都幾吸引,兩個人花咗大約200蚊,飲咗啤酒,食咗雞翼。

其他報道:無印良品「蘋果提子果汁冰棒」疑含霉菌 已下架停售

其他報道:長期病患2歲童染甲型流感 昨入深切治療部後死亡

相關字詞﹕編輯推介 美食車

上 / 下一篇新聞