港聞

【Emily Online】CY最後答問會 三司十三局唔齊人 (12:30)

特首梁振英今朝喺立法會出席任內最後一次答問大會,三司十三局首長幾乎全員到齊,但唔見教育局長吳克儉同創科局長楊偉雄,點解呢?原來成日被人話頻繁外訪嘅吳局長咁啱今次又係去咗外地訪問,而楊偉雄今早有其他活動所以無去立法會。

其他報道:【特首答問會】梁振英:房屋問題「標本兼治」 可建單位為前屆政府2.5倍

答問大會9點半開始,官員席上,頭一排就係三位司長,政務司長張建宗、律政司長袁國強同財政司長陳茂波排排坐,第二排開始就係各位局長座席,其中零零舍舍有個位空咗,好顯眼,Emily再數一數人頭,原來係少咗教育局長吳克儉同創科局長楊偉雄,但吳克儉個位係由副局長楊潤雄署任,佢有坐喺局長席間。

吳局長去咗邊呢?原來局長噚日同8間大學高層啟程去北京交流,佢噚晚先喺FB貼圖文,介紹佢哋一行人噚日同北京市教育委員會劉宇輝主任會面,就高等教育交換意見,仲預告今日將會同教育部官員會面,並出席京港高校交流會。局長離港期間,由副局楊潤雄署任局長職務。

至於創新及科技局長楊偉雄今早去出席理大Hotel Icon舉行嘅《泰晤士高等教育》創新與影響高峰會,所以先去唔到答問大會。

雖然局長唔齊人,但副局長同政治助理就非常捧場,好多都嚟咗立法會旁聽CY嘅最後一次答問大會,濟濟一堂,非常熱鬧喎!

其他報道:樓價續升 施永青:單靠減需求不足夠 李永達:供應上升惟較上屆政府增長不多

其他報道:劉兆佳:港人慣民主派「另類」一國兩制論述 中央重奪話語權並非「搬龍門」

相關字詞﹕編輯推介 梁振英 答問會 吳克儉 楊偉雄

上 / 下一篇新聞