醫委會改革新方案即將上立法會，今朝公民黨郭家麒、自由黨張宇人齊齊上商台節目傾呢個議題，兩人一度嘈到疊晒聲，要主持人調停。
其他報道：公司東主欠款3000萬 稱被「大耳窿」強迫打劫銀行 企圖搶劫罪罪成
事源主持人問及郭家麒對新方案嘅睇法，但佢講咗一陣都未講到自己到底支持定唔支持，結果張宇人就忍唔住口話，郭家麒喺節目度同喺立法會上都一樣兜兜轉轉咁消耗時間，佢仲同主持講「如果你嗰啲聽眾唔瞓着覺呢，我睇好多人都轉台添呀」。
郭家麒聞言就話張宇人咁樣係人身攻擊，張宇人「回敬」話，如果郭家麒覺得被佢人身攻擊，可以告佢。郭家麒就講，自己唔會攻擊張宇人係「廿蚊張」，但張宇人接口話「唔係呀，我係廿蚊張呀」，最後兩個人疊晒聲，要主持人調停。
到主持人成功調停咗佢地兩個之後，張宇人再話：「你以為你可以掩蓋我正義嘅聲音咩？你無可能掩蓋得到我嘅郭家麒，你無咁嘅本事。」