港聞

【Emily Online】一周逾800人血紅素不足未能捐血 紅會推介補鐵湯水 (22:12)

近期紅十字會多番呼籲捐血,令響應嘅市民增多,不過,如果喺捐血站檢查時發現血紅素不足,就暫時唔可以捐血。香港紅十字會輸血服務中心嘅facebook專頁「熱血使命」今日話,過去兩星期,每周大約都有超過800人因為血紅素不足而被暫緩捐血,鼓勵捐血人士多啲從日常均衡飲食中增加身體鐵質吸收,等身體鐵存量回復正常水平,提升血紅素水平。

其他報道:調查指最多港人對雞蛋過敏 鴨肉、奇異果、蘑菇、蠔易致敏

紅十字會話,4月29日至5月5日,因血紅素不足而被暫緩捐血人數有828人,女士佔599人,男士佔229人;而5月6日至5月12日總數就有885人,女士佔666人,男士佔219人。

紅十字會就推介咗一款湯水「烏豆黑木耳木棉魚湯」(食譜見附圖)畀大家,仲引述營養師話,烏豆含有豐富鐵質,亦有不飽和脂肪酸,可以促進膽固醇代謝、降低血脂同預防心血管病,另外纖維質含量亦高,可以促進腸胃蠕動,所以建議飲湯時連埋烏豆一齊食!

紅十字會網頁仲載有多款食譜(http://bit.ly/2pTT8WJ),介紹點煮可以增加吸收鐵質嘅菜色,當中木耳同牛肉經常出現,兩者都含有豐富鐵質,而菠菜都係佢哋推介嘅入饌材料,因為菠菜可以補血、止血。除咗鐵質之外,仲有豐富維他命C、胡蘿蔔素、蛋白質、礦物質同鈣等。

紅十字會仲提醒,要解決缺鐵性貧血問題,除咗食豐富鐵質食物之外,用餐時,同時進食含有維他命C嘅食物,可以有助鐵質吸收架!

其他報道:【短片】鄺俊宇促加強放蛇打擊非法繁殖場 蔣麗芸倡齊齊去掃蕩 鄺:放蛇要低調,打鑼打鼓去狗都走晒

其他報道:房協研究郊野公園邊陲土地發展房屋 消息:包括大欖及馬鞍山郊野公園

相關字詞﹕編輯推介 捐血 鐵質 血紅素 湯水

上 / 下一篇新聞