港聞

【Emily Online】AO歌王退休多嘗試 主持翻譯唱歌樣樣掂 下月做中華廠商會總幹事 (16:52)

民政事務局前常任秘書長、人稱AO歌王嘅楊立門離開官場約兩年,一直有好多唔同嘅工作,包括開演唱會做歌手,佢最近就走入港台,幫慶回歸節目《香港有你》做主持,訪問多個界別嘅強人,其中包括中大校長沈祖堯、港大醫學院長梁卓偉、導演許鞍華等等。

其他報道:幼子發現性交片段揭發不倫戀 失婚中醫及長女認亂倫還押候判

節目《香港有你》一連十集,訪問建築、醫療、時裝等界別嘅兩代人,透過佢哋嘅經歷,講香港回歸20年來嘅變化。楊立門話,自己過去三十幾年喺政府做過唔同部門,對唔同範疇都有一啲認識,可以同唔同嘅受訪者交流,係好開心嘅事,所以佢都無問到報酬,就答應咗做主持。

楊立門話,佢曾經喺97年回歸交接前嘅一個晚宴上做過主持,都有小小經驗,今次唔係第一次做主持。佢又話,退休嘅好處係可以畀佢嘗試做好多唔同工作,例如唱歌、做翻譯,佢本身對語言好有興趣,不時都有幫一啲國際會議做即時傳譯,甚至當年仲喺政府工作時都有幫手,仲話二十幾年前曾經同葉太葉劉淑儀一齊拍過檔做即時傳譯𠻹。

楊立門又話,佢嚟緊下月8日將會正式返一份新工,就係中華廠商聯合會嘅總幹事,以往喺政府部門工作,3度做過同工業界有關嘅部門,包括工業處、工商科技局,以及工業貿易處,認為工業界嘅人好真誠。

佢仲話,廠商會長搵佢做總幹事嘅時候,同佢講呢份工限制唔多,可以做兼職,畀佢喺工餘時間唱歌,所以佢最後都揀咗呢份工。

其他報道:【Emily Online】曾俊華1017萬選舉開支廣告佔逾半 羅永聰做義工無人工

其他報道:【網上熱話】熱心消防員馬路救貓 暖爆網絡被讚男神 下午報喜已為小貓覓新家

相關字詞﹕楊立門 ao歌王 香港有你 葉劉淑儀 中華廠商聯合會 編輯推介

上 / 下一篇新聞