港聞

【Emily Online】曾俊華1017萬選舉開支廣告佔逾半 羅永聰做義工無人工 (14:19)

選舉事務處今日公開特首選舉落選人曾俊華嘅競選開支同所獲捐贈詳情,擅打公關宣傳戰嘅曾俊華,總開支約為1017萬元,當中用咗約549萬元喺選舉廣告,廣告開支係3名候選人中最高,其中營運競選網頁、Facebook、YouTube同Instagram就共花約220萬元。

其他報道:【網上熱話】熱心消防員馬路救貓 暖爆網絡被讚男神 下午報喜已為小貓覓新家

呢220萬元開支入面,以拍攝短片使費為主,最少花逾百萬元。曾俊華競選時獲政商界人士、親朋以至助選團成員支持,為佢拍攝共16條「拍住上」宣傳短片,呢輯短片花咗36萬元製作。

一條喺競選初期發布、長約一分幾鐘嘅「請支持行政長官參選人曾俊華」 短片,花約49萬元製作,至於著名導演杜琪峯幫曾俊華拍嘅「杜Sir飯局」,用咗近29萬元拍攝,不過杜Sir就免收其中12萬元製作費。

曾俊華曾形容佢嘅助選團「(有錢亦)買唔到」,文件顯示,曾俊華只係用約115萬元聘請選舉助理同代理人,金額係3名候選人中最低。至於助選主將羅永聰,由於去年底辭任政治助理後未過一年「冷河期」,所以係無收人工做義工嘅。

另外,不時予人感覺「口窒窒」嘅曾俊華,競選時花咗近5.2萬元,訓練辯論同應對傳媒技巧,包括用3萬元聘請資深傳媒人黃潔慧訓練辯論。

曾發起眾籌嘅曾俊華,所獲捐贈約為1533萬元,其中每筆1000元或以下小額捐贈總數約549萬元,係3名候選人中最高。

大額捐贈方面,曾俊華獲55筆10萬元或以上捐贈,包括獲港區全國政協楊敏德同前立法會議員詹培忠各捐25萬元,港視主席王維基捐20萬元,合和實業董事總經理胡文新就捐10萬元。

其他報道:幼子發現性交片段揭發不倫戀 失婚中醫及長女認亂倫還押候判

其他報道:【反釋法遊行被捕】楊岳橋指充滿政治目的 質疑為何親中報章預先知拘捕行動

相關字詞﹕編輯推介 曾俊華

上 / 下一篇新聞