港聞

下一篇
上一篇

【Emily Online】網民貼大快活「古董」糖包 陳年小丑Logo成熱話 杜汶澤都有回應 (17:31)

時代走得太快,舊嘢一直被新嘢取代,其實「集體回憶」概念愈趨盛行,舊事舊物再現每每令大家懷念,就好似近日檸檬茶都重推舊包裝,引來網民一致好評,成為一時佳話。

其他報道:myAV SUPER指TVB抄襲指控全無理據 引數據稱流量勝myTV SUPER 要求無綫道歉

有網民噚日喺facebook專頁「大埔」,分享兩張大快活嘅外賣糖包相,引發網民like爆,皆因糖包上嘅Logo竟係好多年前快餐店商標嘅小丑樣。

發帖網民話係佢同事執嘢時發現,已經講唔出係幾時產物,Emily搵搵資料,呢個小丑Logo大快活1972年開始用,足足用咗成30年,直到2003年底更換商標,計落呢個糖包最少都有14年歷史,以食物嚟講都可算係「古董」。

呢兩包舊糖吸引咗超過800人畀表情符號,有人留言話包糖係佢小學時產物,結果被人笑佢暴露咗自己年齡,有人話睇返小丑樣覺得有啲恐怖,有人就感嘆小丑時期嘅大快活係最霉時期,出名嘢唔好食生意唔好。

最好笑係有人求食評,叫發帖人開左佢試吓係咩味,猛用理性角度分析話包糖唔受潮就應該仲食得,發帖人當然無試啦,話畀阿姐掉咗,有人就覺得佢唔啱,認為應捐畀文化博物館或者畀返大快活。

仲有人講笑叫大快活而家代言人杜汶澤回應一下,結果竟然真係引出「真‧杜汶澤」回應,留言「跳X起」,網民即講笑叫佢化返個小丑妝先好跳。

唔少人仲齊齊「話當年」,有人即時上網搵返當年謝霆鋒任代言人嘅MV,話好記得個用飯代麵包嘅漢堡唔好食,有網民就話見證大快活換咗而家橙色底白公仔跳起Logo之後,啲嘢當堂好食咗,望住佢起死回生咁話。

Emily就撐呢位資深網民呀,當年大快活用咗1500萬嚟打造全新形象,換Logo之餘仲大賣廣告,間間分店使100萬翻新,加上食物質素改善,業績愈來愈好,早年頂住壓力續用杜汶澤做代言人,更被不少網民大讚有「吉士」(膽色)添。

其他報道:myAV SUPER指TVB抄襲指控全無理據 引數據稱流量勝myTV SUPER 要求無綫道歉

其他報道:義助老翁挑手推車上山 Terry Sir獲網民讚賞感鼓舞 籲多幫助別人

其他報道:【知多啲】天氣潮濕易發濕疹? 專科醫生講點解

相關字詞﹕編輯推介 網上熱話 emily online 大快活 杜汶澤 小丑 糖包

上 / 下一篇新聞