港聞

下一篇
上一篇

【多圖:Emily Online】林鄭食早餐茶餐廳 上屆選戰梁振英唐英年都有幫襯 (17:18)

候任特首林鄭月娥當選後第二日,繼續馬不停蹄落區見市民,展示親民一面。佢今朝出席完電台節目,坐AM190候任特首座駕,去樂富「三和茶餐廳」幫襯,叫咗港式奶茶同蛋牛治烘底,茶餐廳老闆娘「七嫂」就全程陪伴在側,唔少市民都要求合照同拎簽名。

其他報道:【多圖】林鄭樂富食蛋牛治 熱情市民強吻面頰

Emily諗吓諗吓呢間樂富茶餐廳有啲熟口面,於是翻查資料,發現原來上屆特首選戰,三和茶餐廳都係其中一個「戰場」,真係好紅喎!

話說當時已表態參選嘅唐英年喺2011年12月落區見市民,又係去三和食早餐,點咗火腿腸仔通粉,食完之後又起身向食客派單張。不過佢就好低調,事前未有通知傳媒採訪。

兩個月後,對手梁振英又到訪呢間茶餐廳,老闆娘「七嫂」仲坐喺佢隔籬,同枱仲有時任立法會議員嘅民建聯陳鑑林,同埋多名民建聯區議員。

資料又顯示,呢間特首候選人同候任特首都好鍾意到訪嘅茶餐廳,原來老闆娘「七嫂」馬麗媚係樂富中心商會主席,曾經以「特別邀請人士」身分獲委任汕頭市政協委員。

其他報道:林鄭樂富食早餐 茶餐廳老闆娘曾任政協 區議員讚林太親民

其他報道:李慧琼現身中聯辦 稱「有事找他們協助」

相關字詞﹕林鄭月娥 落區 梁振英 唐英年 候任特首 樂富 三和茶餐廳 編輯推介

上 / 下一篇新聞