港聞

下一篇
上一篇

【片段+多圖:Emily Online之特首選舉】杜琪峯操刀拍曾俊華飯局 Ben sir翁靜晶游清源撐場 李鵬飛笑曾太唔會扮龍蝦 (22:42)

曾俊華喺facebook上載咗一段名為《杜sir飯局》嘅短片,原來早前佢同杜琪峯(杜sir)一齊煮飯,仲約咗一大班朋友坐埋一枱食飯。呢班朋友來頭都唔細,除咗曾太同杜sir之外,仲有李鵬飛同太太、輪椅運動員余翠怡、《852郵報》創辦人游清源、中大講師Ben Sir、DJ森美同律師翁靜晶,更唔少得頭號薯粉田北俊。

曾俊華喺fb寫道,呢段片係杜sir親自操刀記錄,開頭首先係曾俊華同杜sir去九龍城街市買餸,然後兩人各自煮一道菜,杜sir就煮咗潮洲白烚魚,曾俊華喺曾太協助之下,煮咗一道台山糯米雞。

煮食期間主持張寶華就問到曾太,拍拖時點知係命中注定呢,曾太就話「唔知架,都係順其自然」,不過曾俊華就插嘴話「感覺到架」,張寶華追問係咩感覺時,曾俊華就笑笑口話:「感覺嘅嘢講唔到架。」

到咗食飯時間,一班朋友圍埋食佢兩個煮嘅餸菜,一齊講講對時政睇法。言談間曾俊華話,無咩理由睇到中央唔信任自己,仲批評「梁振英點叫啲泛民嚟傾嘢,無可能,佢亦都不屑叫你埋嚟」。曾俊華覺得,特首係應該將市民諗法傳遞畀中央,張寶華就問「你夠唔夠膽講先?」曾俊華就話,「如果接得呢份工,呢個就係你嘅責任」。

森美就話,為市民覺得有啲驚,「如果阿sir係我哋心目中有信心嘅,但出嚟個結果,選委因為中央畀落嚟先選另一個,個選舉咪好不知所謂?」曾俊華就笑住話,仲以為森美會話「咁多個特首都無咩好下場,做咩仲要去選特首呢?」杜sir就插話問曾俊華,「揀份衰工你都揀?」曾俊華就話,參選原因同佢當年返香港一樣,就係想繼續服務市民。

飛哥就抽水話,咁多年都唔認識曾太,相信曾太唔會耀武揚威,唔會扮龍蝦,又讚曾俊華有親和力,認為佢至少可以令立法會唔會拉布拉咁多,覺得佢勝任特首。

張寶華最後重提曾俊華喺美國夾過band,組過「浪子樂隊」,仲叫佢即席表演結他,最初曾俊華推卻話「無玩結他N年喇」,但最後都露咗一手,彈咗許冠傑嘅《浪子心聲》,大班朋友仲跟住一齊唱添。

其他報道:【特首選舉】選戰最後倒數 曾俊華明日巴士巡遊 海怡廣場出發終點愛丁堡廣場

其他報道:【特首選舉】陪林鄭探板間房長者 周永新澄清非支持對方:任何一個候選人想同我傾,我都同意

其他報道:短片:林鄭偕周永新探板間房長者 自言相識幾十年 認同最重要改善市民福祉

其他報道:【特首選舉】民建聯民調:林鄭管治能力勝曾俊華 曾俊華「綜合能力」稍勝

相關短片:

相關字詞﹕編輯推介 特首選舉 曾俊華

上 / 下一篇新聞