港聞

下一篇
上一篇

【Emily Online】名人辦公室大搜查 究竟張枱亂唔亂……? (20:48)

3名特首候選人噚晚去咗亞洲博覽館出席由選委籌辦嘅特首選舉論壇,其中林鄭月娥講到有咩欣賞對手曾俊華時,就話每次去曾俊華辦公室都好羨慕,因為見到對方枱頭「乜嘢都無」,無file又無紙張,搞到佢不知幾羨慕,仲話「對我嚟講就好難做得到,因為我係好多文件夾睇返以前呢件事係點,同埋嚟緊要去邊介紹政策呢,我都要做好多準備」。

其他報道:【選舉論壇】林鄭稱羨慕曾俊華辦公室桌面乾淨 曾俊華:除咗work hard,要work smart

高教界選委呂秉權:習近平案頭非常整潔 林鄭點評價習主席張枱呢?

呢番「枱頭論」即成熱話,一向被譽為「人肉抽濕機」嘅自由黨田北俊,當然唔蝕底,今日就即刻喺facebook貼出自己辦公室,睇落枱面都幾整齊,係地下有幾份報紙礙眼啲,最吸睛當然係枱面嘅薯片啦,真係無負佢「頭號薯粉」嘅封號,佢仲標籤咗「#唔係林鄭羨慕的那張枱」。

呢個帖文上載咗6個鐘,就吸引到超過7500個網民畀表情符號,當中有5個嬲嬲,有網民就好搞笑咁留言話:「拜託田少,可否唔好再抽呀?否則唔止地球上嘅水,連火山嘅溶岩都俾你抽乾埋啦!」

Emily睇見田少幅相,就諗起其實唔少政界中人或名人受訪時,都好鍾意約記者去自己辦公室到影相,即時查查資料庫,發現原來唔少名人辦公室,其實都幾整齊架喎。

就好似長和系主席李嘉誠咁,佢2013年接受內地南方都市報訪問,張枱幾乎無嘢咁,整齊到不得了;同年Ikea隻公仔「路姆西」因為特首梁振英而爆紅,CY都有喺特首網誌「自抽」,可見成張枱只係得隻公仔,以及佢競選時行到邊帶到邊嘅一本簿一支筆,亦唔覺有好多文件。

同特首選舉欠點緣份嘅葉劉淑儀,舊年受訪講參選時都選擇以辦公室為背景影相,從相中可見佢枱頭都有唔少文件;同葉太一樣近日常應邀分析特首選舉嘅立法會前主席曾鈺成,去年立會換屆時曾fb直播辦公室情況,睇起嚟都係整齊嘅。

民主黨劉慧卿及公民黨梁家傑,舊年臨別立法會齊齊接受本報訪問講斷捨離,喺挑戰前兩人辦公室都有啲亂,不過如果只係以枱面計,卿姐都真係比梁家傑多好多文件喎。同樣係公民黨嘅楊岳橋舊年都被議員助理出賣,喺fb貼上佢雙腳放枱嘅豪邁相,一樣唔覺枱頭文件堆積如山。

至於非本港代表,例如美國前總統奧巴馬同台北市長柯文哲呢,辦公室張枱正正常常,都算整齊。睇完咁多名人辦公室大晒冷,如果以非正式統計同分析,似乎真係女士會多嘢啲喎,其實關唔關事呢,Emily就真係唔知喇。

特首選舉候選人仲有胡國興。

其他報道:【多圖】林鄭丁太被指好似樣 網民:加埋陳甘美華猶如三姊妹

其他報道:林鄭fb 5日沒更新被嘲disconnect 競選辦:出帖沒規律,指控無需要

其他報道:【知多啲】食肉菌連殺兩人 記緊3個自保貼士

相關字詞﹕編輯推介 辦公室 林鄭月娥 選舉論壇 劉慧卿 楊岳橋 李嘉誠 梁家傑 柯文哲 奧巴馬 葉劉淑儀

上 / 下一篇新聞