港聞

【短片:Emily Online】曾俊華拍片回網民「Mean」留言 指支持或批評都有獨到見解 (14:09)

特首候選人曾俊華fb推出新節目「曾‧心Mean」,參考一個外國電視節目嘅做法,喺鏡頭面前逐一讀出網上「好mean(刻薄)」嘅留言批評,再作回應。

其他報道:明報特首選舉專頁

首先第一個留言就話「曾生,你真係似巴黎聖日耳門」,即係上周歐聯16強賽事中,被西甲球隊巴塞隆拿「逆轉勝」嘅法甲球隊,曾俊華就笑住回應,「如果個球證夠中立、公正,贏同輸都唔緊要,我已經盡咗力跟踢呢場波,我覺得我會似巴塞多啲」。

另外又有網民留言話佢「牆頭草、冇主見、冇腰骨,老闆永遠是對的」,曾俊華就話:「其實Peter(網民名)你先係我老闆,730萬市民」。仲有留言就諷刺佢「恭喜曾先生!榮獲陪跑員!」曾俊華就回應:「我係陪跑,不過係未來5年陪全部嘅香港人一齊跑」。

除咗短片,曾俊華亦有留言話網民毋須玩弄語言偽術,可真心表達意見同交流,佢自己每日都會去睇網民留言,不論熱情支持或尖銳批評,「不少都有獨到見解,面對批評有則改之,無則加勉」。但佢認為惡意中傷、人身攻擊、欺凌都唔能夠容忍,香港人都應該尊重其他人、為自己言論負責,而從政者就須要以身作則,基於事實說話,「同時應該以寬容態度去化解衝突,疏導勝於圍堵」。

特首選舉另兩位候選人為林鄭月娥、胡國興。

其他報道:陳志雲上訴得直:終可在晴朗一天出發 盼港人捍衛獨立司法制度

其他報道:李華明:中央支持成死亡之吻 林鄭須面對爆炸議題 曾俊華只「剝花生」

相關字詞﹕特首選舉 曾俊華 曾‧心mean 網民留言 特首跑馬仔 曾俊華 林鄭月娥 胡國興 編輯推介

上 / 下一篇新聞